[A:144]gsung ngag rin po che slob bshad kyis gtso byas/ gsang chen zab mo'i chos kyi 'khor lo rab mchog gya nom par bskor nas/ bstan pa'i rgyal mtshan rnam pa thams cad du 'dzin par mdzad pa yin la/ slad kyi'ang bdag cag gi rje bla mas rjes su bzung zhing / gsung las skye pa'i skal pa bzang po'i pad mtsho mdangs gsal ba la rnam dpyod kyi 'dab ma phyogs brgyar 'god pa'i ge sar snying por/ snyan brgyud kyi sbrang rtsi 'dzin pa'i dpal yon can dag gis skal ldan gyi bung ba mtha' yas pa gsang chen gyi bdud rtsis ngoms par byas nas/ lung rtogs kyi dar dir nam mkha'i mtha' klas par sgrog pa ni bsam pa'i ra ba las 'das pa yin no/ /de bzhin du rlom pa gzhan yod na'ang de ltar gyis shig kho bo cag gis 'dren byed kyi rdul lan brgyar phyis te lta bar bya'o/ /smras pa/ chad par rlom par skye bo'i cho 'phrul bstan/ /rtag par zhen tshe chos dbyings ngang du gzims/ /snang stong sgyu ma'i rol rtsed ci yang rtsen/ /yab gcig he ru ka dpal sgyu 'phrul can/ /da ni khyod kyi sgyu 'phrul brdas bstan pa'i/ /srid zhi'i snang brnyan rmi lam zlos gar 'dir/ gzhan na ma mchis rang sems gcig pu'i 'phrul/ /sems nyid ngo bo rtogs bya rtogs byed bral/ /rus sbal spu yis nam mkha'i padma khebs/ /chu nang zla ba brag ca'i sgra yis bos/ /ri bong rwa yis mo gsham phrug gu bsad/ /sngon chad don med 'khrul pas rang mgo skor/ /blta rgyu med pa'i sems la da ni blta/ /mthong rgyu med pa'i don ni kho bos mthong / /brjod rgyu med pa tshig tu ci zhig brjod/ /kye ho da ni nyams len zad do kye/ /