[A:145]yang smras pa/ med bzhin snang la snang bzhin med/ /bden na 'khrul la 'khrul na bden/ /smra zhing mang la mang zhing smra/ /rtogs na mkhas pa mkhas na rtogs/ /de skad smra ba'i sprang po blo gsal des/ /snying la bas mtha'i ri khrod bsam bzhin du/ /da dung bzhi mdor btang snyoms ngang du lus/ /bdag chen chos rjes dbyings nas thugs rjes gzigs/ /ji ltar bdag ni phyugs bdag rdzi bo bzhin/ /blun po brgya phrag tshogs pa'i do ra ru/ /shes ldan mkhas pa gcig pur gnas byed pa/ /sngon las zhes bya'i grags ldan de yin lo/ /'on kyang dam pa'i bka' drin snying la zhugs/ /skal ldan tshogs na legs bshad spel bas mchog /gcig pur 'dug na sems la ltas pas chog /ji ltar byas na bde ba bla ma'i drin/ /ces pa ni bar skabs kyi tshigs su bcad pa'o/ /bdag chen rdo rje 'chang chen po'i rnam par thar pa yid 'phrog utpa la'i do shal zhes bya ba las/ rnam par grol ba'i sku mngon du mdzad pa'i tshul 'phros don dang bcas pa'i skabs te bcu gcig pa'o// //de ltar na rje btsun sa skya pa yab sras kyi bzhed pa la/ 'o skol gyi ston pa mnyam med thub pa'i dbang po de nyid me mo yos la lhums su zhugs/ sa pho 'brug la sku bltams/ brgyad cu rtsa gcig pa sa pho byi ba'i lo 'go rtsom pa na mya ngan las 'das shing / de nyid kyi bstan pa lo lnga stong gnas pa'i dbang du byas nas/ lha mo dri ma med pa'i 'od lung bstan pa'i mdo las gsungs pa ltar/ ston pa mya ngan las 'das nas lo nyis stong