[A:147]zhing 'dir chos kyi 'khor lo rgya chen po bskor/ srin po zhes bya ba shing mo yos kyi lo la zhing gzhan du gshegs pa'i tshul bstan/ de ltar na ston pa mya ngan las 'das nas/ bdag nyid chen po 'di zhing gzhan du byon pa'i tshul bstan pa yan la lo sum stong drug brgya sum cu rtsa gnyis 'das pa yin la/ da ni lhag ma stong dang sum brgya drug cu rtsa brgyad gnas par shes par bya'o/ /smras pa/ bde 'byung dbang pos zla shel gtsug gi nor bur mchod na khyod zhabs spyi bor mi mchod ci/ /gser mngal 'od kyis mdzes ma la chags gdong bzhi sprul na khyod zhabs blta 'dod skal bzang mchog /bhra ma'i bu mos gtum bu dga' ster rgyud mang sgrog na khyod mnyes bstod sprin ces mi spro/ /blo gsal rtogs brjod mchod sbyin brgya pas lan brgyar bsngags na dam pa'i rnam thar mi smra gang / /de slad blo gsal mang thos padma'i tshal/ /gsang chen nor bus yongs gang chu gter las/ /snyan ngag srad bur brgyus pa'i rtogs brjod kyis/ /yid 'phrog utpal do shal 'di byung ngo / /skal bzang dad pa'i lang tsho gsar pa can/ /rnam dpyod bzhin ras gsal ba'i gzhon nu dag /byin rlabs dngos grub rtse dgar rol 'dod na/ /rmad byung gtam 'di mgrin pa'i rgyan du long / /nor 'dzin khyon gyi rdul phreng ji snyed pa/ bgrang bar rlom pa'i ngal bas ci zhig bya/ /de phyir bdag ltas dam pa'i yon tan ni/ /cha shas tsam yang brjod par ga la spobs/ /de ltar na'ang yid bzhin chu mtsho yi/ /rin chencen mtha' dag blang bar ma nus na'ang / /nor bu gcig gis 'dod rgu ster ba ltar/ /