[A:66]'dis/ /bung ba dga' bar ma zad kyi/ /ngang pa'i bu mo kun yid 'phrog /'jam dbyangs bla ma'i gsung gi bdud rtsi'i rgyun/ /gsang chen zab mo'i bcud kyi snying po des/ /thugs kyi bum bzang yongs su gang ba las/ /gangs can rdo rje 'dzin pa'i ded dpon gyur/ /khyod thugs 'od gsal dag pa'i me long du/ /mthu ldan srung ma'i sgyu 'phrul rol rtsed dang / /lkog gyur shes bya'i snang brnyan ci yang shar/ /thogs med mngon mkhyen mnga' bar yongs su grags/ /lugs kyi bstan bcos sbrang rtsi 'dzin pa'i gzhi/ /'di yi blo gros chu skyes gsar pa'i tshal/ /rab yangs dri bsung gsil yab g.yo ba yis/ /shes ldan skye bo'i snying la sim pa ster/ /bdag chen rdo rje 'chang chen po'i rnam thar yid 'phrog utpa la'i do shal las gzhon nu rol rtsed mdzad cing yab las thog mar bka' drin nos pa'i skabs te gnyis pa'o// //'khor ba'i grong khyer me 'obs ltar gzigs nas/ /thub bstan pad mtshor zhugs te gangs can gyi/ /mkhas grub yongs kyi gtsug gis bsten pa'i khrir/ /zhabs sen padma bkod la phyag 'tshal lo/ /des na bcom ldan 'das kyi mdo las/ khyim pa rnams ni me 'obs na gnas pa lta bu'o/ /rab tu byung ba ni bsil ba'i khang pa na gnas pa lta bu'o/ /zhes sogs dang / khrims ni rgyu dang mi rgyu'i sa bzhin du/ /yon tan kun gyi gzhi bsten lags par gsungs/ /zhes sogs gsungs pa ltar/ 'khor ba'i khyim thab ni 'jigs shing nyam nga ba'i sdug bsngal thams cad kyi rtsa bar gzigs/ mtho ris dang byang chub sgrub pa'i lam thams