[A:68]mo lug gi lo la rje btsun gcen dang / lhan cig tu dpal sa skya'i chos grwa chen por che 'don mdzad cing tshangs pa'i dbyangs lta bu'i gsung gis dam pa'i chos kyi bka' drin stsal ba na blo gsal mkhas pa'i tshogs rnams ngo mtshar zhing mi phyed pa'i dad pa thob/ de las gzhan pa'i skye bo rnams ni zhal mthong gsung thos pa'i bag chags khyad par can rgyud la bzhag cing zang zing gi sbyin pas yid rab tu tshim par mdzad/ de yang dga' ston gyi yo byad rnams dge sdings bla brang rang nas mdzad cing rnam gzhag gi yo byad gang dgos pa rnams 'jam dbyangs dkon cog bzang po'i drung gis 'bul ba gnang / slar yang dgung lo dgu pa nas bcu gsum pa 'dzin byed ces bya ba me pho byi ba'i lo'i bar 'jam dbyangs chos rje de nyid kyi phyag phyir nyang stod phyogs su phebs shing slob dpon dpal mchog par grags pas kyang zur slob kyi tshul gyis zhabs tog mdzad/ rje de nyid kyi drung du rgyas pa'i bstan bcos tshad ma rnam 'grel/ 'grel pa 'grel bshad dang bcas pa/ sde bdun gyi snying po tshad ma rigs pa'i gter rang 'grel dang bcas pa/ thub pa'i dgongs pa gsal ba/ sdom pa gsum gyi rab tu dbye ba/ dbu ma rtsa ba shes rab la sogs pa'i dbu ma'i gzhung lugs ci rigs pa dang bcas pa gsan te/ tshig don cha la sgro 'dogs mtha' dag chod cing thugs su chud par mdzad pa yin no/ /gzhan yang theg pa chen po dbu ma lugs kyi sems bskyed/ gsung ngag rin po che smin grol gyi lam cha tshang ba/ rgyab chos su pod nag ma tshang ma'i lung / lam skor phyi ma brgyad/ lam zab mo bla ma'i