[A:74]dpal ting 'dzin sprin rum las/ /rigs sngags 'brug sgra zab mo'i gdangs skad kyis/ /mngon sum bros tshe nyams rtogs bdud rtsis myos/ /bdag chen rdo rje 'chang chen po'i rnam thar yid 'phrog utpala'i do shal zhes bya ba las rgyal ba'i bstan pa la rab tu byung zhing dpal ldan sa skya'i gdan khrir chos kyi 'khor los sgyur bar mnga' gsol ba'i skabs te gsum pa'o// //rdo rje 'chang dbang dkon mchog rgyal mtshan dpal/ /sras kyi thu bor bcas pa'i zhabs bsten nas/ /bsnyen par rdzogs shing gsung ngag lam 'bras sogs/ /zab don ma lus gsan la phyag 'tshal lo/ /de nas rje btsun kun dga' dbang phyug pa'i zhal chems las ji ltar byung ba bzhin dgung lo nyer gcig bzhes pa nyi sgrol zhes bya ba shing pho spre'u'i lo la mus la phebs par bzhed pa na ma rung ba 'ga' zhig gis phyogs lhung gi dbang gis bzhed don la bar chad byas dogs pas/ thog mar skyed lhas su sku mtshams la phebs pa'i tshul mdzad/ de gong nas mkhas pa kun blo ba brgyud de rje'i drung du snyan gsan skor mtha' chod pa phul rjes/ lha rtse ba dpon btsun dkon cog bzang po zer ba zhig gis rgyus yod kyi lam sna byas/ pu tra skyabs la sogs phyags phyi ba nyung shas dang bcas srod la gsang thabs su gdong dga' bar zhabs thang du phebs/ de nas mtsho bor phebs/ mtsho bo nas mus kyi bar la mtsho bo nang pa bsod nams dpal 'byor pas chibs pa dang 'phral gyi sku chas la sogs phul/ phu tse bas kyang gser dang ras yug la sogs pa phul te/