[A:75] rim bzhin brgyud nas mus su phyags phebs/ rigs thams cad kyi bdag po/ dkyil 'khor thams cad kyi gtso bo/ dpal 'khor lo sdom pa nyid ngur smrig 'dzin pa'i gar gyi rnam par rol pa mus chen sems dpa' chen po dkon mchog rgyal mtshan dpal bzang po'i drung du gegs med du mjal/ mjal ma thag nas thugs kyi dad pa tshad med 'khrungs shing / rje nyid kyis dgyes tshor dang bcas pas bsu ba gseng sprengs sogs bkur sti dpag tu med pa gnang / de nas rten ni gsum las dge slong mchog /'bring ni dge tshul yin par 'dod/ /khyim na gnas pa tha ma'o/ /zhes dang / dge slong zhes bya chos kyi rgyal mtshan te/ /dge slong zhes bya rdo rje'i srog shing yin/ /zhes dang / tshul khrims ldan pa'i dge slong 'od dang ldan/ /tshul khrims ldan pa grags 'gyur bde ba thob/ tshul khrims ldan pa 'jig rten kun gyis bstod/ /tshul khrims kyis ni 'gro ba dam pa mthong / /zhes sogs mdo rgyud rnams las lan gcig ma yin par phan yon dang bsngags pa brjod pa rgya cher gsungs pa rnams kyis yid phrogs te/ lo de'i tha skar zla ba'i tshes bcu'i nyi ma snga dro'i char skyes bu gcig dang / rkang pa drug gi dus su grub chen rnal 'byor gyi dbang phyug chen po dang / rjes btsun sa skya pa kun dga' snying po la sogs pa'i byin gyis brlabs shing / mkhas grub du mas zhabs kyis bcags pa'i gnas mchog ya ma bde ldan chos rdzong gi ri khrod du mkhan po yongs rdzogs bstan pa'i mnga' bdag rje sems dpa' chen po de nyid dang /