[A:95]mthun 'jug dang / ngo bsrung la sogs gtan nas mi mdzad/ tshur zhabs kyi padmor 'dud cing gus pas mchod pa na chos kyi bka' drin ci rigs pa bstsal nas/ slar yang ngang pa padma'i tshal du 'jug pa ltar/ /thugs dam dang sku mtshams kyi rim pa nges pa can la rang dbang du 'jug par mdzad pa las sus kyang cung zad g.yo bar mi nus pa yin no/ /byang chub kyi sems rnam pa gnyis thugs rgyud la legs par 'khrungs pa'i rtags mgon med cing 'phongs pa nad sdug bsngal la sogs pas gzir ba'i nyam thag pa rnams gzigs pa na/ de dag la nye bar mkho ba'i zas dang / gos dang / sman la sogs pa phyag nas bdar de gnang bar mdzad cing / rje rang gis de dag gi nad g.yog dang dbugs dbyung ba la sogs pa mdzad pas/ nad la sogs pa de 'phral du grol bar 'gyur ba phal cher la yong bar snang ste/ dper na sgom sde'i bla ma ngag dbang grags pa zhes bya ba 'phan yul gro sar gsung ngag gnang ba'i dus nad drag po zhig gis btab pa la 'tsho byed mkhas par byas pa sus kyang ma phan zhing /mo rtsis sogs thams cad kyis 'chi bar thag bcad pa'i tshe rje nyid kyis gzigs shing sman thun gcig gnang bas de ma thag nad las grol ba lta bu'o/ /de bzhin du gzhan dag la yang / sman dang sman pa nyid dag dang / /de yi nad g.yog byed par shog /ces gsungs pa ltar/ bsod nams chen po thob pas nad g.yog legs par byed dgos pa yin zhes ched du bka' stsal bar mdzad/ de mthun snyom chung