[A:121]gcen gyi zhal nas/ drung pa phebs pas go bcad/ de khas blong kha rdzogs gsung pa la sogs dgyes tshor chen po gnang / sku rim gsol sman sogs kyi zhabs tog bsgrubs/ zla ba gsum pa'i tshes bco lnga la rje btsun dam pa rgya dkar shes rab rgyal mtshan dpal bzang po nyid ngo mtshar ba'i ltas du ma dang bcas te zhing gzhan du gshegs pa'i tshul bstan/ de rjes dgongs pa rdzogs thabs rnams phyag rdzas gang yod kyi steng nas dge sdings rang du rgya cher bsgrubs/ slar yang gdan sar phebs te rje nyid kyi phyag rdzas kyi steng nas rje btsun gcen gyi thugs dgongs rdzogs thabs su dril thog dro bar 'gyed bcas la sogs pa phun sum tshogs pa bsgrubs/ yang skyed lhas su phebs te/ sku mtshams dang mgon po la mchod gtor 'bul ba la zhag 'ga' zhig bar la bzhugs shing / de rjes gting skyes nas chos rje kun dga' rgyal mtshan pas gsol ba btab pa'i ngor zla ba drug pa'i nyer lnga la bzhi thog tu phebs/ chos rje dpon slob nyi shu rtsa lnga la gsung ngag rin po che lam yongs su rdzogs par gnang / mdor na rje btsun dam pa 'dis dang por spa kong dgon par gsung ngag rin po che gnang ba nas bzung ste/ tha ma 'di yan la gsung ngag rin po che tshar nyi shu rtsa grangs pa dang / gzhan yang sde snod gsum rgyud sde bzhi dang 'brel ba'i chos kyi sgo mtha' yas pa zhig gnang bas 'gro ba mang po smin cing grol bar mdzad pa yin la/ de dag kyang / mkhas gang shes bya'i de kho na/ /ji bzhin rtogs pa yin par 'dod/ /bye brag sbyangs pa'i don shes pa/ /de yang de la mkhas pa yin/ /