[A:122]ces gsungs pa ltar/ /gang dang gang gnang ba'i chos de dag la thos bsam gyi sgo nas sgro 'dogs legs par chod cing bsgoms pas/ nyams su myong ba'i sgo nas gnang ba yin la/ 'chad tshul yang / blo chen rnam la zab rgya che/ /blo chung bzung bde go sla ba/ /de las zlog na mkhas rmongs kyi/ /slob ma dga' ba bskyed mi nus/ /zhes gsungs pa ltar/ slob ma'i blo gros kyi rim pa dang bstun te/ yid yul du shin tu 'bab cing sems 'phrog pa zhig 'ong bar thos gnang ba'i kun slong kyang / chos sbyin nyon mongs can min pa/ /mdo sogs yang dag ji bzhin ston/ /ces dang / chos kyi sbyin pa zang zing med/ /bsod nams 'phel ba'i rgyu yin no/ /zhes gsungs pa ltar/ chags sdang dang 'jig rten chos brgyad kyi kun nas blangs pa'i rtogs pa thams cad ring du spangs te/ bstan pa dang sems can gyi don kho na la dgongs nas skyo ngal med par gnang bar mdzad pa yin no/ /de ltar 'chad pa'i sgo nas rjes su bzung zhing bka' drin thob pa'i zhal slob kyang / sa chen po'i rdul tsam gyi bsam gyis mi khyab pa yod pa rnams ni zhib tu bgrang bar ga la nus/ rags pa tsam dper mtshon na phan tshun bka' drin rjes su nos pa'i dam pa bzhi ni/ rje sems dpa' chen po'i snyan brgyud 'dzin pa'i sras kyi thu bo chos rje sangs rgyas dpal bzang pa/ rje de nyid kyi sku'i dbon po grub pa mchog gi dbang phyug dkon mchog blo gros pa/ gsang chen zab mo'i gter mdzod chos rje blo gros rin chen pa/ rgyal ba'i gsung rab rab 'byams la mkhas pa'i paNDi ta dpal ldan rgyal