[A:124]drin mang du thos pa'i yang dgon chos rje dpal ldan bkra shis pa/ snyan brgyud zab mo'i gter mdzod sgo rum pa rje btsun kun dga' legs pa'i blo gros rgyal mtshan dpal bzang po/ thub bstan gser mdog can gyi gdan sa pa chos rje rin chen kun dga' rgyal mtshan pa rnams so/ /yongs rdzogs snyan brgyud zab mo'i 'gran zla kun dang bral ba'i thugs sras mchog tu gyur pa ni/ bdag cag gi dpal ldan bla ma dam pa rje btsun rdo rje 'chang chen po kun bzang chos kyi nyi ma blo ldan shes rab kun dga' rgyal mtshan dpal bzang po'i zhal snga nas so/ /gzhan yang gsung chos kyi 'brel pa thob pa ni/ dpal ldan sa skya'i phyogs su chos rje mgon po dbang phyug pa dang / chos rje rdo rje seng ge la sogs pa du ma dang / 'bring mtshams phyogs su gting skyes pa chen po brag dkar ba sogs du ma nyang smad bsam grub rtse phyogs su/ brag dmar rab 'byams pa kun dga' tshe 'phel la sogs pa/ shar phyogs su mthu stobs kyi dbang phyug chos rje dbu legs pa la sogs pa/ dbus phyogs skyid shod du lum pa chos mdzad kun dga' rgyal mtshan pa la sogs pa/ 'phan yul phyogs su tshes brgyad dka' bcu pa bsod nams rin chen la sogs pa du ma/ khams phyogs su chos gling drung pa lhun grub rgyal mtshan/ a gro drung pa bkra shis rgyal mtshan pa rnams so/ /gzhan yang zhwa lu lo tsA ba chos skyong bzang po la sogs pa'i rig gnas la mkhas pa mang po/ grub chen sangs rgyas dpal ba la sogs pa ku sA li'i rnal 'byor pa bgrang yas byung ngo /