[A:12]thams cad zil gyis gnon par nus pa'i blo gros dang / sgam zhing brtan la mthu stobs phun tshogs pas/ yi ge dang / rtsis dang / brtag pa rnam pa brgyad la sogs pa lugs kyi bstan bcos thams cad bde blag tu mkhyen nas/ lugs gnyis kyi spang blang phra mo tshun chod la gzhan dring mi 'jog pa'i spobs pa thob/ mtshan lhun grub nam mkha' rdo rje tshe brtan dpal 'byor bzang po zhes grags/ bdag chen 'jam dbyangs chen po yab sras gsum/ lce ston rin po che seng ge yab sras/ paN chen bsod nams blo gros/ mkhas grub chos kyi dbang phyug /rje btsun rdo ring pa chen po/ mkhan chen dkon mchog tshul khrims/ rje bya btang kun dga' chos ldan/ rnal 'byor dbang phyug kun dga' rgyal mtshan/ sems dpa' chen po bsod nams rgyal mtshan/ bdag chen thams cad mkhyen pa/ ri khrod pa nyi ma grags pa/ mthu stobs dbang phyug dkar chen kun dga' grags sogs las snga phyir chos mang du gsan/ khyad par dgung lo bcu gsum pa la rang gi a ne 'khrul zhig kun dga' chos ldan las rdzogs pa chen po sangs rgyas mnyam sbyor gyi 'khrid bskyangs pas/ nyams gong 'phel gyi snang ba mngon du gyur/ gzhan yang zhi khro dgongs pa rang grol dang / spyod yul sogs khrid du ma gsan zhing / nyams su blangs pas sgyu lus rmi lam la rang dbang thob ste lcang lo can la sogs pa sangs rgyas kyi zhing du mar yang byon/