[A:161]bzhed dang bstun pa'i bka' dbang 'bul gyin gnas pa'i dus/ rin spungs nas gnam sa'i dbang phyug 'khor lo sgyur ba'i rgyal po des bka' shog pho nya dang bcas pa phebs pa ltar myur du phyin te/ rgyal po'i pho brang de na/ bod yul gyi dregs ldan thams cad kyi cod pan brtul zhugs spyod pa'i rdo rje bcu gcig pa glo chen thams cad mkhyen pa'i drung gdan chags 'dug pa bzhin/ ched du 'bod par gnang bar 'dug /bdag rang la sgos chos su dpal 'khor lo sdom pa nag po'i lugs kyi dbang bzhi sngon du 'gro ba rim bzhi'i nyams khrid cha lag dang bcas pa zhig gnang / sde pa rin po che'i phyags phyir tshe khrid rgyas pa dang / do ha'i bshad pa shin tu zhib pa/ gzhan yang mgon po che chung / dmar po skor gsum/ rgyud sde lnga'i dbang rgyas pa smin byed du btang ba'i shangs chos kyi gser chos rnam pa lnga'i dbang lung khrid sogs chos kyi sgo du ma'i sku drin thob/ grub dbang spyod pa'i rdo rje bcu gcig pas/ /grub brnyes nag po'i bzhed gzhung gsal bar bstan/ /grub gnyis mngon du byed la gegs med ces/ /grub pa mchog des gzengs bstod dbugs dbyung mdzad/ /rje bla ma chos kyi 'byung gnas chos rdzong pa'i zhabs las kyang bla ma dgongs pa 'dus pa'i don dbang bsdus pa sngon du 'gro ba'i chos skor po ti brgyad kyi lung sogs chos du ma zhig thob/ snga 'gyur bstan pa'i bdag po 'ug pa lung nas chos kyi rje zur haM rgyal ba'i sras po yab sras kyis zhus pa'i ngor/ dpal