[A:170] de nas zla ba dgu pa'i tshes bzhi la/ bdag gi bla ma grub thob kyi 'khor lo sgyur ba lce ston rin po che chos kyi dbyings su gshegs pa'i bang chen sleb pa nas nyin mtshan bshad nas 'ongs te/ sku gdung rin po che'i phyag phyi dgung zhag gi gsol 'debs sogs bsgrub cing pa rnam bsam sdings su re zhig bsdad pa na/ 'khris kyi rgyal po des cung zad bar chad byed kyi 'dug nas rmi lam du legs par btul/ de tshe sde pa a brtan drung phebs te dgongs pa rdzogs thabs kyi gsol 'debs/ gdung brgyud rin po che la che 'don/ phyag phyi rnams la gang la gang 'os kyi bdag rkyen sogs phyis kyi mig ltos la phan pa zhig mdzad song na'ang / nang de na bcud 'phrog ma'i mtshan nyid thams cad tshang ba zhig gda' ba de khams bzang ring bar tshogs khang pas ji tsam 'bad kyang lugs gnyis nas go tshugs mi yong ba thag chod gda'o/ /de nas rin cen sgang du sleb snod ldan bcu gcig la dpal rdo rje 'jigs byed kyi rwa khrid snyan brgyud kyi myong khrid dang / tshogs pa byings la grub chen brgyad cu'i rjes gnang sogs chos du ma so so'i bzhed pa bzhin bshad/ nged yon tan gyi cha shas khyi la 'dug kyang len/ yon tan med pa'i blun po gos bem can rta drel mang po can la blo mi 'gro ba zhig bdog pas/ dge slong zla rgyan pa zhes bya ba phur pa'i rtsa 'chams dga' mo shes pa zhig yod pa de las sa phur gyi 'chams mthar phyin pa zhig kyang blangs/ rang lo so drug pa'i lug lo zla ba dang po la/ rin spungs rgyal po'i khab tu/ lce'i sngags 'chang grub brnyes dge slong