[A:171]chos bzang bkra shis pa'i zhal snga nas byams chen nas spyan drangs/ pha chos 'char ka sgrom bu ma'i dbang lung man ngag thams cad rdzogs par thob/ byin rlabs kyi mtshan ma ya mtshan pa zhig kyang byung zhing / gzhan yang tshe sgrub nyi zla kha sbyor sogs dbang lung kha yar zhus/ phar yang dgongs bzhed dang bstun thugs sgrub kyi dbang 'bring po phul/ zla ba de'i tshes bcu gnyis la myug tu sleb pa bzhin/ de dang rtse bstun zhwa lu nas rje bla ma byang gling 'jam pa'i dbyangs spyan drangs myug chos sde'i bla brang du zla ba gnyis kyi bar chos rje thams cad mkhyen pa nas brgyud pa'i bya spyod dang / rnal 'byor bla med kyi dbang rje nyid la ji ltar mnga' ba thams cad rdzogs par zhus/ phar bde chen ral gcig gi smin grol rdo rje slob dpon bdag po chen po'i bar yongs su rdzogs pa dang / mi g.yo ba bla med/ tshe dpag med nyer sgrub rnams kyi dbang / khyung khra/ sna tshogs yum sogs rjes gnang kha yar dang / phyag phyi ba rnams la/ sgrol ma bla med/ mgon po beng / phyag bzhi pa rnams kyang phul zhing / zang zing gi 'bul ba zhabs tog kyang thugs kyi shing rta yongs su khengs pa bgyis so/ /de nas rang nyid dge sbyor gang 'phel zhig byed snyam pa/ rje mi la ras pa ltar ltogs gugs la ni mi tshugs/ mi gzhan la re ba las/ a jo drung 'dis skyo ngal med par lto gos thams cad bzabs yang dag gnang ba 'di zab rang khye mod/ ga shed du bsdad kyang lhag por 'u lag 'phel ba las mi 'dug pas nye 'khor shig tu dben dgon chung ngu zhig btab pa'i dge sbyor dang / dad pa dang skal ldan byung na 'chad nyan gong 'phel yin pa la/ khur 'khur dgos mang po'i sdug po de 'dra ma