[A:188]dam pa'i chos mtha' yas pa'i sku drin zhus/ zla ba bdun pa'i tshes nyer gcig nas bstan pa'i bdag po rdo ring rin po che'i dbon du sku 'khrungs pa'i lha btsun chos kyi rje bsod nams dpal bzang pos dbu mdzad/ 'chad nyan pher nges kyi bla ma lngas gtsos pa'i skal ldan nyi shu tsam la gsung ngag rin po che lam 'bras bu dang bcas pa'i khrid legs par btsugs/ de dag gi khrod nas rags bsdus shig la dpal nag po chen po gur gyi mgon po lha brgyad kyi rjes gnang dang / mgon po khro bcu zangs gri can gyi rjes gnang sngon du 'gro ba'i snyan brgyud slob bshad las 'ongs ba'i phyi nang gi khrid/ bdag chen rdo rje 'chang chen po nas brgyud pa'i mgon pod me 'bar ma kha skong dang bcas pa/ ngor lugs kyi ser pod/ rdzong chen pa lugs dang / gong dkar rdo rje gdan pa'i lugs kyi yi ge rnams ma tshang ba med pa'i lung sogs 'bul bzhin pa 'di yin la/ zla ba dgu pa'i tshes bzhi nas bzung ste/ dpal sa'i dbang phyug stobs kyi 'khor lo sgyur ba'i sde srid rin spungs nas bkas bskul zhing / rgyal srid chos kyis bskyangs te thub bstan bla mar mdzad pa'i sbyin bdag chen po gnas gsar nas kyi gnas khang / 'tsho ba'i yo byad thams cad ma tshang ba med par sbyar te/ mtho btsun chos kyi rje myug mkhan rin po che'i drung dang / lha btsun chos kyi rjes dbu mdzad pa'i bla ma slob dpon blo gsal zhing 'dun pa dang brtson 'grus