[A:244]pa 'di nyid yin te/ a ho sngon gyi dam pa de dag gi /dka' ba du mas bod 'dir bsgyur ba'i chos/ /snyan brgyud phal cher ston gyi chu 'dzin bzhin/ /mtshan yang lhag ma med pa'i dbyings su yal/ /'ga' zhig grong khyer rnying pa'i khron pa bzhin/ /ding sang dus na mtshan tsam lhag mar lus/ /glegs bam phal cher dbul po'i gter bzhin du/ /sa rdul khrod nas mun pa'i mal du gzims/ /dam pa'i rgyal po phal cher 'das gyur cing / /gdul bya'i 'bangs rnams bka' bzhin mi byed par/ /thos bsam sgom pa'i khrims la mthong chungs pas/ /gsung rab slob dpon khros nas gsung mi 'byin/ /rgyu des dbang lung man ngag bshad pa'i bka'/ /cung zad lus pa'ang chu skam nya bzhin nam/ /nam gzhug chad pa'i me tog ji bzhin du/ /lkog mar srog phyin gyur pa ma bzod nas/ /gzhan rkyen bstan la dad pa ches nyung zhing / /rang rkyen shes rab snying rjer mi ldan pas/ /bstan pa gsal ba'i nus pa ma mchis kyang / /bstan pa'i sems khral tsam du ngas 'dir 'bad/ /ding sang dpyod ldan mkhas pa ches dkon zhing / /mkhas rlom phal cher phyogs re'i grub mthas khengs/ /ris med chos la dad pa'ang ma mthong na/ /mtha' yas dam chos 'tshol ba'i skal pa ci/ /'byor ldan phal cher blun po'i rkang pa 'dzin/ /'ga' zhig grags 'dod smig rgyu'i rjes su 'brang / /phal cher lto gos sgrub pas rnam par g.yeng / /mkhas blun 'byed pa'i mig ldan nyin skar mtshungs/ /grogs dag dal 'byor 'di ni g.yo ba