[A:245]dang / /slu med skye bo dam pa 'phrad par dka'/ /thub bstan nyin byed 'di'ang nub nye bas/ /myur du dam chos btsal na mi legs sam/ /de phyir nyin mtshan ngal ba yongs spangs te/ /de bzhin gshegs pa'i bstan la rab gus pas/ /de ltar dka' bas dam pa'i chos btsal nas/ /de nyid rtogs pa'i thabs la 'bad 'tshal lo/ /zang zing bde skyid mching bus mi mgu bar/ /dad brtson gtong phod gru rdzings cher bskyed de/ /ris med dam pa'i chos tshul rgya mtsho cher/ /thogs med 'jug par nus pa de su yin/ /de ltar thos pa tsam gyis mi phan de'i don nyams su ma longs na mtsho gting gi rdo ba bzhin nam rgya mtsho'i 'gram du skom grir shi ba dang mtshungs pa gsungs 'dug pas rnam g.yeng thams cad spangs nas mi med kyi lung stong zhig tu grogs med gcig pur sngo dang rde'u za zhing 'chi ba sgug sdod byed snyam pa lan gcig min par byung na'ang / byis pa'i dus su bsam med rtsed mos g.yengs/ /dar la bab tshe gzhan ngo bsrung nas g.yengs/ /rgas tshe gzhan don ltar snang khur gyis g.yengs/ /blun po bdag la dal ba'i go skabs ci/ /shas cher snyoms las le lo'i ngang du song / /kun rmongs gnyid kyi mun pas nye bar 'thibs/ /dgos med zing long mang pos mdun nas 'khyud/ /snying med bdag la gal chung chos su mchis/ /des na blo kha rdzogs pa'i 'chi chos gsha' ma zhig ma grub mod/ 'on kyang sngar bshad pa ltar lhag pa'i lha'i bsnyen pa yang cung zad song zhing /