[A:7]thugs rje la bsams na a tho yod la re/ nga rang gi byed lugs la bltas na dmyal ba las 'os mi gda' bas/ gang 'dra 'char ram bsam pa'i the tshom me ba 'di ga ma gtogs/ da lta gdengs khel ba zhu rgyu mi gda'/ da lta ba rang nyid skye ba blangs pa nas brtsams te/ rang lo sum cu rtsa brgyad phan gyi gnas tshul sgro ma btags/ skur pa ma btab par/ ji ltar gnas pa'i yon tan gyi cha rnams mdo tsam yi ger 'dri ba la/ skyon ci yang med/ yod na'ang yod du chug /sprang po kha 'chal 'don pa'i kha sus kyang dgag par nus pa ma yin no/ /e ma ho/ rgyal ba kun dngos tshar chen chos kyi rjes/ /rjes su bzung nas chos kyi rgyal srid la/ /dbang sgyur sngags 'chang dbang po mkhyen brtse'i dbang / /dpal ldan skal pa bzang po 'di na dge /bskyed rim gdengs ka'i dbang phyug gis bskrun zhing / /rdzogs rim sprin sngon gsar pa'i phreng ba las/ /bzlas brjod 'brug sgra bye ba'i sgra dbyangs kyis/ /dngos grub nor bu'i char rgyun 'bebs la dbang / /thog med 'khor bar zo chun 'phyan pa bzhin/ /mtho dman 'byor rgud 'dus rten ji snyed blangs/ /de dag phal cher don med don log dang / /don chung bya ba sgrub pa kho nar song / /da lam sngon gyi smon lam thugs rje'i mthus/ /skyon med rdo rje theg pa'i dal 'byor thob/ /mtshan ldan dam pa du ma'i drin gyis bskyangs/ /bsams na bde zhing skyid pa'i tshad du snang / /de yang dngos po'i gnas tshod la rang res grul btub mi btub gtso ba ma gtogs/ rigs brgyud bzang po yin pas dga' ba'i nges pa mi gda'