[A:༡༢༣]བ་ཡིན་ཏེ། གསེར་གྱི་རྒྱན་རིན་པོ་ཆེ་པདྨ་རཱ་ག་དང་ཨིནྡྲ་ནཱི་ལ་ལ་སོགས་པས་སྤྲས་པ། མུ་ཏིག་གི་ཕྲེང་བས་བསྐོར་ཞིང་བལྟ་ན་སྡུག་པ་བས་ཀྱང་མཆོག་ཏུ་མཛེས་པའི་རྩོམ་པའི་ཕྲེང་བ་རྣམས་ནི་མཐོང་ཤིང་ཐོས་པ་ན། མཁས་པ་རྣམས་ཀྱི་ཡིད་དགའ་བ་སྐྱེ་ཞིང་བློ་གསལ་རྣམས་ཀྱི་ཁ་རྒྱན་དུ་གྱུར་ལ་ཤེས་ལྡན་རྣམས་ཡིད་སྨོན་གྱི་གནས་སུ་བྱེད་པ་ཤ་སྟག་མཛད་པ་ཡིན་ནོ། །འདིའི་རྩོད་པའི་ཚུལ་ནི་མཚུངས་པ་མེད་པའི་བློ་གྲོས་དང་ལྡན་ཞིང་འཇིགས་པ་མེད་པའི་སྤོབས་པ་བརྙེས་ནས་ཕྱིན་ཅི་མ་ལོག་པའི་གཞུང་ལུགས་མཁྱེན་པས་རྣམ་པར་དག་པའི་ངག་གིས་སྨྲས་ཏེ། སྐྱོན་མེད་པའི་དམ་བཅའ་བརྗོད་ཅིང༌། བཟློག་པར་མི་ནུས་པའི་ཐལ་བ་འཕེན་པས་ཕས་རྒོལ་གྱི་སྤོབས་པ་མྱུར་དུ་འཇོམས་པ་ཡིན་ཏེ། རང་གི་སྡེ་པ་ལ་བོད་ཀྱི་བློ་གསལ་མཁས་པ་ཆེན་པོར་རློམ་ཞིང༌། སྨྲ་བ་པོར་གྲགས་པ་དུ་མ་ཡང་ཕམ་པར་མཛད་ཅིང༌། རྒྱ་གར་གྱི་པཎྜི་ཏ་འགའ་ཞིག་ཀྱང་ཟིལ་གྱིས་མནན་ལ། གཞན་གྱི་སྡེ་པ་འཕྲོག་བྱེད་དགའ་བོ་ལ་སོགས་པ་ཕྱི་རོལ་པའི་མཁས་པ་དྲུག་ཀྱང་སྤོབས་པ་མེད་པར་བྱས་ནས་ལྟ་བ་མཆོག་ལ་བཙུད་པ་ཡིན་ནོ། །དེ་ལྟར་དགུང་ལོ་དྲུག་ཅུ་རེ་གསུམ་པའི་བར་དུ་བོད་དུ་བཞུགས་ནས། རིམ་གཉིས་ཟབ་མོའི་ཐུགས་དམ་ལ་རྟག་ཏུ་མཉམ་གཞག་གི་ངང་ནས་ཆོས་འཆད་པ་དང༌། རྩོད་པ་དང༌། རྩོམ་པས་དུས་འདའ་བར་བྱེད་ཅིང༌། སངས་རྒྱས་ཀྱི་བསྟན་པ་ནམ་ལངས་པ་ལ་ཉི་མ་ཤར་བ་ལྟ་བུ་མཛད་པའི་དབང་གིས་ཛམྦུ་གླིང་ཐམས་ཅད་དུ་མཁས་པའི་གྲགས་པས་ཁྱབ་པ་དང༌། བླ་མ་རྗེ་བཙུན་ཆེན་པོས་དུས་ཕྱིས་བྱང་ཕྱོགས་ཀྱི་རྒྱལ་ཁམས་ནས། མི་སྐད་རིགས་མི་གཅིག་པ་ཞྭ་ཁྲ་འཕུར་བ་འདྲ་བ་གྱོན་པ། ལྷྭམ་ཕག་པའི་སྣ་འདྲ་བ་གྱོན་པས་ཁྱོད་གདན་འདྲེན་དུ་འོང་བ་ཡིན། དེའི་དུས་སུ་ཐེ་ཚོམ་མ་བྱེད་པར་སོང་དང་སངས་རྒྱས་ཀྱི་བསྟན་པ་ལ་ཕན་པ་རྒྱ་ཆེན་པོ་འབྱུང་ཞེས་ལུང་བསྟན་པ་དང༌། རྒྱལ་པོ་གོ་དན་གྱིས་ཆོས་རྗེའི་སྐུའི་སྙན་པའི་གྲགས་པ་