[A:༡༢༤]གསན་པ་ལ་བརྟེན་ནས། དཔོན་པོ་དོར་ཏ་ཞེས་བྱ་བ་ལ་གསེར་ཡིག་པ་བཏང་ནས། བོད་ཀྱི་ཡུལ་ན་ས་སྐྱ་པ་ཞེས་བྱ་བའི་བནྡེ་བཟང་པོ་ཅིག་ཡོད་པར་འདུག་པས། དེ་ཁྱོད་ཀྱིས་གདན་དྲངས་ལ་ངེད་ཀྱི་རྩར་སླེབ་ཏུ་ཆུག་གསུངས་པའི་དོན་ལ། དཔོན་པོ་དོར་ཏ་ཁོ་རང་བླ་མ་ཆོས་རྗེ་པ་ལ་མཇལ་ནས། རྒྱལ་བུ་གོ་དན་གྱི་ལུང་བསྒྲགས་པས། རྗེ་བཙུན་ཆེན་པོའི་གསུང་དྲན་པའི་སྟོབས་ཀྱིས་དགེས་ཤིང་སྤྲོ་བ་དང་བཅས་པས་ཞལ་གྱིས་བཞེས་ནས། ཤིང་ཕོ་འབྲུག་གི་ལོ་དགུང་ལོ་དྲུག་ཅུ་རྩ་གསུམ་བཞེས་པ་ལ་ས་སྐྱ་ནས་ཁུ་དབོན་གསུམ་གདན་བཏེག་ནས་བྱོན་པ་ལས། ལམ་སོ་ན་ཡོད་པའི་དགེ་བའི་བཤེས་གཉེན་རྣམས་དང༌། སྐལ་བ་དང་ལྡན་པའི་གདུལ་བྱ་མང་པོས་དབང་བྱིན་རླབས་དང༌། རྒྱུད་འགྲེལ་མན་ངག་དང་བཅས་པ་ལ་སོགས་པ་དད་པ་ཆེན་པོའི་སྒོ་ནས་ཞུ་བ་རྣམས་ལ་ཆོས་ཀྱི་འཁོར་ལོ་བསྐོར་ཞིང་བྱོན་པའི་དབང་གིས་ལམ་དུ་ལོ་གསུམ་འགོར་རོ། །དེའི་ཚེ་དགེ་བའི་བཤེས་གཉེན་བཀའ་གདམས་པ་ནམ་མཁའ་འབུམ་གྱིས། ཧོར་འདི་ལ་ཁྱེད་ཀྱིས་བྱོན་པས་ཕན་པའི་རྒྱུ་མཚན་བདོག་གམ་ཟེར་བ་ལ་ཧོར་འདིས་ངེད་ལ་ཅིས་ཀྱང་མཆོད་གནས་ལ་ཤོག་མི་འོང་ན་དམག་འོང་ཟེར་བས། དམག་བྱུང་ན་བོད་ལ་གནོད་ཀྱིས་དོགས་ནས་འགྲོ་བ་ལགས། སེམས་ཅན་ལ་ཕན་དུ་རེ་ནས་འགྲོ་བ་མ་གཏོགས་པ་ཕན་ངེས་པའི་རྒྱུ་མཚན་མ་མཆིས། ལར་སེམས་ཅན་ལ་ཕན་ན་རང་གི་ལུས་སྲོག་གཏོང་བ་ལ་ཡང་མི་ཕོད་མི་བདོག་བ་ཙམ་ཤེས་པ་གདའ་གསུངས། འབྲོ་གསང་དུ་ཕེབས་པའི་ཚེ། མི་ཅིག་གིས་དར་ནག་པོ་གཅིག་ལ་གསེར་གྱི་ཐིག་ལེ་མང་པོ་བྱས་པ་ཅིག་ཕྱག་རྟེན་ལ་ཕུལ། དེ་ལྷ་རྗེ་བི་ཇི་ལ་གནང་ནས་ཁྱོད་རང་ཚགས་གྱིས། ནམ་མཁའ་དྭངས་པ་ལ་སྐར་མ་བཀྲ་བ་ལྟ་བུའི་བསྟན་པ་ཅིག་འོ་ཅག་ལ་འོང་བ་ཡིན་གསུངས། ས་སྐྱ་པས་རིང་བསྲེལ་བཀག་ཟེར་བ་ཡོད་པ་ལ། དེ་ཡང༌། རིང་བསྲེལ་ཕལ་ཆེར་གདོན་ལས་བྱུང༌། །