[A:༦༡] །མཁས་གྲུབ་བླ་མའི་ཞལ་ལས་བླངས། །རྣམ་དཔྱོད་ཤེས་ལྡན་གྲ་ཚོགས་དབུས། །སྒྲོ་འདོགས་ལེགས་པར་བཅད་པ་ཡིས། །རང་གཞན་གྲུབ་མཐའི་ཚིག་དོན་ཤེས། །ཀུན་དཔྱོད་ལྡན་པ་ཀུན་ལ་གཅེས། །དེ་ལ་དགེ་བཤེས་ཟེར་བ་ཡིན། །གསང་སྔགས་ཚད་ལྡན་རྒྱུད་སྡེ་ཡི། །ནང་ནས་བཤད་པ་དང་མི་འགལ། །བླ་མ་མཚན་ཉིད་ལྡན་པ་ཡི། །ཞལ་ནས་བླངས་པའི་འཁྲུལ་མེད་ཀྱི། །བརྒྱུད་པ་མན་ངག་ལྡན་པ་ལ། །གསང་སྔགས་པ་ནི་དེ་ལ་ཟེར། །མཚན་ཉིད་གཞུང་ལུགས་ལྟ་ཅི་སྨོས། །རྒྱུད་སྡེའི་དབྱེ་ཙམ་མི་ཤེས་པར། །རང་ལུགས་ཕྲ་མོའི་འཇོག་མཚམས་མེད། །དཀའ་བཅུ་རབ་འབྱམས་མིང་བཏགས་ནས། །དཀོར་ཟས་ཟ་ཞིང་ཧམ་གཏམ་ལབ། །མི་ཤེས་པ་ལ་ཁྱད་གསོད་བྱེད། །ཤེས་པ་དག་ལ་བརྙས་བཅོས་བྱེད། །རྒྱུན་དུ་ཆོས་གོས་རྣམ་གསུམ་ལ། །འཕོངས་སེམས་སྐྱེས་ནས་སྒྲིལ་ཏེ་འཇོག །མི་ནག་མགྲོན་པོ་བྱུང་བའི་ཚེ། །མཆོར་གོས་རྣམ་གསུམ་དག་ལ་བྱེད། །འདི་འདྲ་མཐོང་ཚེ་དགོད་རེ་བྲོ། །ལ་ལ་བུ་དང་ཆུང་མ་བྱས། །ཆོས་གོས་ལྷུང་བཟེད་གྱོན་ཁྱེར་ནས། །གདིང་བ་བཏིང་ནས་ཆོས་རྫུ་བྱེད། །རང་གཞན་གཉིས་ཀ་ཅིག་ཅར་བསླུ། །ཉམས་མྱོང་ཐོས་པས་ཀུན་ནས་དབེན། །བླུན་པོ་གླང་རྒན་འདྲ་བ་དག །ཆ་ལུགས་མཛེས་མཛེས་དོམ་ར་ཅན། །ཞབས་རྟེན་སྐྲ་བཅད་སེར་གཟུགས་བྱས། །དེ་མ་ཐག་ཏུ་ལུས་གནད་བྱེད། སྙིང་རྗེའི་སྟོང་སྐད་ང་རོ་སྒྲོག །བླ་མར་ངོ་སྤྲོད་ཞུ་ཡོ་སྐད། །བླ་མས་ངོ་སྤྲོད་ཡིན་ཟེར་ནས། །ལ་ལ་བློ་རོ་ཚིག་སྐམ་ཤོད། །ལ་ལས་དཔེ་ཆ་བལྟས་པ་ཡི། །དོན་སྤྱི་རྟོག་བཅོས་ཚིག་དོན་ཤོད། །དེ་ལ་སྒོམ་བློ་ཅུང་ཟད་བྱས། །རབ་ལ་གནས་པ་ཅུང་ཟད་སྐྱེས།