[A:61] /mkhas grub bla ma'i zhal las blangs/ /rnam dpyod shes ldan gra tshogs dbus/ /sgro 'dogs legs par bcad pa yis/ /rang gzhan grub mtha'i tshig don shes/ /kun dpyod ldan pa kun la gces/ /de la dge bshes zer ba yin/ /gsang sngags tshad ldan rgyud sde yi/ /nang nas bshad pa dang mi 'gal/ /bla ma mtshan nyid ldan pa yi/ /zhal nas blangs pa'i 'khrul med kyi/ /brgyud pa man ngag ldan pa la/ /gsang sngags pa ni de la zer/ /mtshan nyid gzhung lugs lta ci smos/ /rgyud sde'i dbye tsam mi shes par/ /rang lugs phra mo'i 'jog mtshams med/ /dka' bcu rab 'byams ming btags nas/ /dkor zas za zhing ham gtam lab/ /mi shes pa la khyad gsod byed/ /shes pa dag la brnyas bcos byed/ /rgyun du chos gos rnam gsum la/ /'phongs sems skyes nas sgril te 'jog /mi nag mgron po byung ba'i tshe/ /mchor gos rnam gsum dag la byed/ /'di 'dra mthong tshe dgod re bro/ /la la bu dang chung ma byas/ /chos gos lhung bzed gyon khyer nas/ /gding ba bting nas chos rdzu byed/ /rang gzhan gnyis ka cig car bslu/ /nyams myong thos pas kun nas dben/ /blun po glang rgan 'dra ba dag /cha lugs mdzes mdzes dom ra can/ /zhabs rten skra bcad ser gzugs byas/ /de ma thag tu lus gnad byed/ snying rje'i stong skad nga ro sgrog /bla mar ngo sprod zhu yo skad/ /bla mas ngo sprod yin zer nas/ /la la blo ro tshig skam shod/ /la las dpe cha bltas pa yi/ /don spyi rtog bcos tshig don shod/ /de la sgom blo cung zad byas/ /rab la gnas pa cung zad skyes/