[A:༦༢] །དེ་ལ་ཉམས་རྟོགས་བཟང་པོར་བརྩི། །བསྒོམ་འཕྲོ་བཞག་ནས་གྲོང་ཡུལ་རྒྱུ། །དངོས་པོ་ཅུང་ཟད་བྱུང་བ་ན། །སེར་སྣ་ཡི་དྭགས་ལས་ཀྱང་ཆེ། །མི་འདོད་ཅུང་ཟད་བྱུང་བ་ན། །དེ་ལན་ཐབས་ནི་སྣ་ཚོགས་ཀྱིས། །གནོད་པ་གང་འཁྱོལ་ལས་ལ་བརྩོན། །ཆང་དང་བུད་མེད་མཐོང་བ་ན། །འཛུམ་དང་གཏམ་གྱིས་བསུ་བ་བྱེད། །མཁར་རྗེ་དབང་ཐང་དེ་ལ་བསྟོད། །དེ་འདྲའི་སྒོམ་ཆེན་དགོད་རེ་བྲོ། །རྟོགས་ལྡན་བཟང་པོ་ཉམས་རེ་དགའ། །དེ་འདྲའི་ཆོས་པ་དག་ལས་ནི། །མི་ནག་སྐྱེ་བོ་དགའ་བ་འདུག །རྟགས་ཙམ་འཛིན་པའི་སེར་གཟུགས་ཀྱིས། །སངས་རྒྱས་བསྟན་ལ་ཕན་ནོ་ཟེར། །དེ་འདྲ་དགོས་པ་ཅན་ལ་དགོངས། །འདི་འདྲའི་སྒོམ་ཆེན་ཅི་ལ་ཕན། །དང་པོ་འཁོར་བའི་ཉེས་དམིགས་གོ །འཇིག་རྟེན་བྱ་བ་ཅོག་གིས་བཞག །ཆོས་ཀྱི་ཕྱོགས་སུ་ལུས་སྲོག་གཏོང༌། །ཆོག་ཤེས་བློ་ཐག་རྦད་ཀྱིས་བཅད། །བླ་མ་མཁས་བཙུན་བཟང་གསུམ་བསྟེན། །ཅི་གསུང་གུས་པས་དང་དུ་ལེན། །གང་ཡོད་དམ་པ་དེ་ལ་འབུལ། །སྙན་བརྒྱུད་གདམས་པ་རྒྱ་ཆེན་ཞུས། །ཐོས་པས་ཕྱི་རྒྱ་ཆོད་པ་བྱས། །བླ་མའི་གདམས་པ་གཅེས་སྤྲས་བྱེད། །བར་དུ་བསྒོམས་པས་སེམས་ཐག་ཆོད། །ཆོས་བརྒྱད་བྱ་བ་མ་ལུས་སྤངས། །བྱང་ཆུབ་སེམས་དཔའ་ཀུན་ནས་བླངས། །དམ་ཚིག་སྡོམ་པ་མིག་འབྲས་ལྟར། །ཕྲ་ཞིབ་ལའང་འཛེམ་བྱས་ནས། །ཚེ་འདིའི་བྱ་བ་ཀུན་དོར་ཏེ། །གཙོ་བོར་ལམ་ཟབ་བླ་མ་དང༌། །རིམ་གཉིས་ཟབ་མོ་རྩེ་གཅིག་སྒོམ། །རྟག་པར་ཟུང་འཇུག་ངང་ལ་གནས། །རྟོགས་པ་ཡར་ངོའི་ཟླ་ལྟར་འཕེལ། །འཕེལ་ཀྱང་ཁེང་དྲེགས་མི་བྱེད་ཅིང༌། །གཞན་གྱི་ཆོས་པ་མཐོང་བ་ན། །དད་པ་དག་སྣང་ཡི་རང་སྒོམ། །འགྲོ་བ་ཀུན་ལ་བུ་ལྟར་བརྩེ། །རྗེས་སུ་བསྔོ་བ་སྨོན་