[A:62] /de la nyams rtogs bzang por brtsi/ /bsgom 'phro bzhag nas grong yul rgyu/ /dngos po cung zad byung ba na/ /ser sna yi dwags las kyang che/ /mi 'dod cung zad byung ba na/ /de lan thabs ni sna tshogs kyis/ /gnod pa gang 'khyol las la brtson/ /chang dang bud med mthong ba na/ /'dzum dang gtam gyis bsu ba byed/ /mkhar rje dbang thang de la bstod/ /de 'dra'i sgom chen dgod re bro/ /rtogs ldan bzang po nyams re dga'/ /de 'dra'i chos pa dag las ni/ /mi nag skye bo dga' ba 'dug /rtags tsam 'dzin pa'i ser gzugs kyis/ /sangs rgyas bstan la phan no zer/ /de 'dra dgos pa can la dgongs/ /'di 'dra'i sgom chen ci la phan/ /dang po 'khor ba'i nyes dmigs go /'jig rten bya ba cog gis bzhag /chos kyi phyogs su lus srog gtong / /chog shes blo thag rbad kyis bcad/ /bla ma mkhas btsun bzang gsum bsten/ /ci gsung gus pas dang du len/ /gang yod dam pa de la 'bul/ /snyan brgyud gdams pa rgya chen zhus/ /thos pas phyi rgya chod pa byas/ /bla ma'i gdams pa gces spras byed/ /bar du bsgoms pas sems thag chod/ /chos brgyad bya ba ma lus spangs/ /byang chub sems dpa' kun nas blangs/ /dam tshig sdom pa mig 'bras ltar/ /phra zhib la'ang 'dzem byas nas/ /tshe 'di'i bya ba kun dor te/ /gtso bor lam zab bla ma dang / /rim gnyis zab mo rtse gcig sgom/ /rtag par zung 'jug ngang la gnas/ /rtogs pa yar ngo'i zla ltar 'phel/ /'phel kyang kheng dregs mi byed cing / /gzhan gyi chos pa mthong ba na/ /dad pa dag snang yi rang sgom/ /'gro ba kun la bu ltar brtse/ /rjes su bsngo ba smon