[A:112] rdo rje'i spun grogs dpon po blo gsal de/ /rje btsun gong la 'chi ba'i bsod nams can/ /de bzhin bdag kyang 'chi ba mi yong bar/ /da dung lus pa'i 'di 'dra'i dus mthong ba/ /sgyu ma'i lus ni chu phung yin pa 'dra/ /min na 'di 'dra'i mchi ma gang las 'bab/ /bdag gi snying ni lcags las grub pa 'dra/ /min na tshal par 'gas las 'os ci yod/ /bsam zhing rang snying zhu ba mig chur babs/ /bsgom shing rje btsun de nyid snying nas dran/ /da ni dngos su mjal ba'i skal ba med/ /sgyu ma'i lus ni bor ma thag de ru/ /rje btsun drung du thogs med phyin chog snyam/ /rang la sems so btang kyang cung zad las/ /ma phan bdag gi gnas skabs 'di gzigs la/ /rje btsun bsgribs med spyan dang thugs rje yis/ /mgon med bdag la yang yang gzigs su gsol/ /ma yengs du zhing gsol ba btab pa las/ /rmi lam ngang du gsal bar yang yang byon/ /bdag gi rna ba'i dbang po g.yas pa la/ /rje btsun zhal gyi padmo sbyar mdzad nas/ /nges don zab mo'i dam chos gnang nas yal/ /cung zad dga' yang da dung mchi ma shor/ /da dung bsam blo btang bas 'di bzhin dran/ /pha rgod rdo rje 'chang chen bla ma des/ /lan cig ma yin yang yang dus rgyun du/ /'khor 'das chos kun rang sems yin no gsung / /khyad par rang sems bla ma phyag rgya che/ /rje btsun dam pa'i bde chen thugs nyid dang / /rang sems dag pa brjod bral bde chen de/ /mtha' dad med do gcig tu legs par soms/ /nga dang 'bral ba med do snying gi bu/ /gsung ba dran nas bdag cag srog 'tshor gyur/ /de nas bdag gis sku'i dbon po sde pa shAkya dpal 'byor gyi