[A:57]zer zhing / glu 'dur ma dbyangs la 'di skad do/ /gzhi tshul khrims kyi sdong po legs brtan zhing / /thos bsam gyi lo 'dab rgyas pa la/ /nyams len gyi 'bras bus phyur bur gtams/ /bshes gnyen dpag bsam gyi sdong po khyed/ /'khrungs yul ni dbus gtsang gang du byas/ /thos bsam gyi slob gnyer gang du bgyis/ /gsang sngags kyi chos ni su la zhus/ /nyams len gyi gtso bo gang la byed/ /rgyun par bzhugs sa ga na yod/ /ces len gyi 'dug /nga'i bsam pa la/ 'di gang la bsam kyang don de rnams bshad chog pa 'dug bsam lan du 'di skad gsungs so/ /lo bcu drug lon pa'i na tshod can/ /mthing zhun mdangs ldan skra mchog mdzes/ /mig ni padma'i 'dab ma 'dra/ /rin chen du ma'i rgyan 'phreng can/ /lha phrug bu mo khyod nyid la/ /dris pa'i lan 'debs glu 'di len/ /thos bsam dang nyams len cher med kyang / /bla ma snying zhugs kyi rnal 'byor nga'i/ /lte ba ni dbus gtsang gi mtshams su bcad/ /rigs ni 'od srungs kyi rigs su skyes/ /bco lnga'i lo la rab byung bsgrubs/ /rdo rje gdan dang gnyis med pa'i/ /'bras yul rdzong dkar chos gra ru/ /'jam dbyangs rnam sprul kun mkhyen la/ /thos pa'i phyogs la cung zad bslabs/ /rdo rje 'chang dang dbyer med pa'i/ /mkhas grub kun gyi gtsug rgyan mchog /gangs can bstan pa'i mig gcig pu/ /rje btsun tshar pa'i zhabs drung du/ /rgyud sde'i yang snying lam 'bras sogs/ /zab rgyas chos rnams ji snyed thob/ /bka' drin chen pos rjes su bzung / /