[A:5]med pa 'byung la/ yon tan bsam gyis mi khyab pa 'phel bar byed pa yin no/ /zhes pa dang / rgyud las kyang / slob dpon yon tan gleng bya yin/ /skyon rnams nam yang ma yin no/ /zhes dang / sangs rgyas dang byang chub sems dpa' ganggA'i klung gi bye ma snyed la/ bskal pa gangga'i klung gi bye ma snyed du bsnyen bkur ba bas ni/ rdo rje slob dpon gyi ba spu'i bu ga la til mar gyis byugs pa bsod nams ches khyad par 'phags so/ /zhes dang / lha sku bye ba stong bsgoms pas/ /bla ma dran pa bsod nams che/ /zhes dang / dus gsum gyi sangs rgyas thams cad kyi yon tan brjod pa bas/ rdo rje'i slob dpon gyi yon tan gyi cha shas tsam brjod pa'ang bsod nams ches cher grub pa yin no/ /zhes dang / gang dag rgya mtsho'i gos can rdul snyed kyis/ /rgyal ba rgya mtsho'i rmad byung ngo mtshar gtam/ /srid mtha'i bar du dbyangs su bsgrags pa las/ /'di na mtshan ldan rdo rje slob dpon gyi/ /yon tan rtog pa brjod pa cha shas tsam/ /brjod pa'ang bsod nams dpag tu med do zhes/ /bslu med dam pa'i gtam gyis yid drangs nas/ /bdag gi yid 'di tshul 'dir zhugs par gyur/ /yid 'ong mtshan dpe'i tshogs kyis spras pa'i sku/ /yid 'phrog tshangs dbyangs lta bur snyan pa'i gsung / /yid bzhin nor ltar 'gro la snyoms pa'i thugs/ /yid la re ba'i 'bras stsol der phyag 'tshal/ /sku gsung thugs kyi gsang ba mi zad pa/ /bdag lta byis pa'i blo yi ci zhig brjod/ /'on kyang ji ltar padmo'i 'byung gnas kyi/ /rin chen mtha' dag len par su yis nus/ /cha shas blangs pas 'dod dgu sbyin pa ltar/ /