[A:6]cung zad brjod 'di'ang don dang bcas pa nyid/ /ma lus rigs kyi khyab bdag rdo rje 'chang / /rtsod pa'i dus 'dir bshes gnyen skur bstan nas/ /rnam mang 'gro la phan bde stsol mdzad pa/ /rgyal sras bla ma'i rnam thar cung zad brjod/ /'dir bdag cag rnams kyi dpal ldan bla ma dam pa dus gsum gyi bde bar gshegs pa thams cad kyi ngo bo rigs thams cad kyi bdag po gdan gsum tshang ba'i ded dpon rgyal ba khyab bdag rdo rje 'chang chen po dang gnyis su ma mchis pa'i mtshungs med rje btsun dam pa/ mchog tu bde bar gshegs pa'i bstan pa rin po che la gces spras su mdzad pa/ sems can thams cad la bu gcig pa ltar lhag par brtse ba'i thugs rje can bden pa gnyis zung du 'jug pa'i ting nge 'dzin dang / rim pa gnyis kyi zab don rdo rje'i rnal 'byor la thugs rtag tu mi g.yo ba/ mkhas pa dang grub pa'i dbang phyug du ma'i sa 'dzin gyi spo las legs par babs pa'i lung dang man ngag zab mo'i bdud rtsi'i rgyun du mas thugs kyi khyon yang dag par gang ba'i bstan pa'i gangs can mtshor skal ba dang ldan pa rnams la sde snod gsum las byung ba'i gdams pa dang / rjes su bstan pa dag gis so so rang rang gi skal ba dang mthun par rgyud smin pa dang / grol bar mdzad pa'i chos kyi ded dpon chen po/ /chos kyi dbang phyug /phyogs bcur dam pa'i chos kyi rnga sgra lhag par sgrog pa'i skyes bu dam pa/ skyes bu khyu mchog de ni nges par stobs bcu mnga' ba'i go 'phang las ma g.yos bzhin du longs spyod rdzogs pa'i sku dang / mchog gi sprul pa'i sku dang / rgyal ba'i sras po sems dpa'