[A:128]pa'i yul ni 'o yug ces pa'i sa'i sman ljongs/ bka' gdams pa'i dge ba'i bshes gnyen chen po skye ba bcu drug gsal ler dran pa la sogs pa yon tan du ma mnga' ba'i mkhas grub chen po 'byung gnas rdo rjes 'debs par mdzad pa'i ram sdings mar grags pa'i dgon gnas dang khad nye ba'i sa/ 'phags pa spyan ras gzigs kyi rnam sprul dbon ston skyer sgang pas slob dpon chen po padma 'byung gnas dang dngos su mjal zhing dpal rta mgrin gyi grub pa brnyes pa'i ri khrod gnas log ces pa'i mdun ngos/ rgyal rigs su gyur pa'i lha btsan po'i gdung brgyud rnams kyis bdag gir mdzad pa'i rdzong gzhis 'o yug gling dkar zhes bya ba'i rgyal rigs de pa'i sgo srung du gyur pa'i las gnyer sgo dpon pa'i rigs su gyur pa'i yab rgya lha zhes pa dang / yum sgrol ma zhes pa'i yab yum mtshan ldan rigs bzang gi skyes bu de gnyis la/ sras lcam sring gsum byung ba'i gcen po bla ma 'di nyid yin te/ mi zad ces pa me pho khyi lo'i tshes bcu zhig la sku bltams/ mtshan 'tsho rgyal zhes gsol zhing / byis pa de yang sngon gyi bag chags bzang pos brtas pa'i dbang gis thugs rig dngas shing / tha mal gyi spyod pa dang bral ba/ gzigs snang mang pos dus 'da' ba zhig yod ces thos/ de nyid cher gyur pa na/ sdings ma mkhan po grub pa'i dbang phyug drung pa 'ga' tshe ba'i zhal snga nas mkhan slob grangs tshang ba'i dbus su rab tu byung ba dge tshul gyi sdom pa bzhes te/ mtshan bslab gsum rgyal mtshan dbang po zhes par gsol/ bslab bya'i gnas mtha' dag la nyes ltung gi dri