[A:༢༦༨] གཉིས་མེད་ཡེ་ཤེས་ཀྱི་འོབ་ཏུ་གནོད་བྱེད་ཐམས་ཅད་བཅུག་པས་རང་དྭངས་སུ་སོང༌། ཞག་གསུམ་སོང་བའི་དགོང་ཐུན་གྱི་དུས་དེ་སྔ་ཡན་ཆར་ཤིན་ཏུ་དཀོན་པ་ས་བོན་རྣམས་ཀྱང་སྐམས་པར་ཐུག་པ་ཙམ་དང་མི་རྣམས་ཉམ་ཐག་པའི་སྐབས་ཀྱིས་སྐྱོ་བར་འདུག་པས། བདག་གིས་འཕགས་མཆོག་སྤྱན་རས་གཟིགས་དབང་ལ་ར་མདའ་བོས་ཏེ། ཡང་དག་པར་རྫོགས་པའི་སངས་རྒྱས་ཀྱི་རྒྱུད་ལས། མཐའ་བཞི་གངས་ཀྱིས་བསྐོར་བའི་རྭ་བ་རུ། །སྦས་པའི་རྣལ་འབྱོར་མེ་ལོང་འཛིན་པ་འབྱུང༌། །ཞེས་པའི་གུ་རུ་རིན་པོ་ཆེ་ཆོས་ཀྱི་དབང་ཕྱུག་གི་མགུར་གྱི་བུམ་པ་ལས་བྱུང་བའི་གདངས་ཀྱི་ཡི་གེ་དྲུག་པའི་ར་མདའ་སྒྲུབ་པོ་ཐམས་ཅད་ལག་སྦྲེལ་ནས་དཀྱིལ་འཁོར་ཁང་པ་ལ་བསྐོར་བཞིན་པས་བོས་པས་དུས་དེ་ཉིད་དུ། འཕགས་པའི་སྤྱན་གྱིས་འཛམ་གླིང་ཀླུ་རྣམས་བསྐུལ་བས་ཐུགས་རྗེའི་བྱིན་རླབས་ཀྱི་ཆར་རྒྱུན་དེ་ནས་བཟུང་ཉིན་ཞག་སྦྲེལ་ནས་བབས་པས་སྐྱེ་འགྲོ་ཐམས་ཅད་བདེ་བའི་གོ་སྐབས་ཐོབ་པ་ཞིག་བྱུང་བས། ལྷ་མི་ཐམས་ཅད་དགའ་བའི་རྟགས་སུ་དེ་ནུབ་རྨི་ལམ་ན་བུ་མོ་གཞོན་ནུ་མཛེས་ཤིང་བརྗིད་པ་གསུམ་གྱིས་དགྱེས་པའི་འཛུམ་དང་བཅས་ནས་ལྷའི་མེ་ཏོག་དཀར་པོ་དང༌། རས་དཀར་པོ་དང་སྤོས་དཀར་པོ་དང༌། དཀར་གངས་ཤེལ་དཀར་ལྟར་དྭངས་པ་དང་དུང་དཀར་གཡས་སུ་འཁྱིལ་བ་ཞིག་རྣམས་སྦྱིན། བདག་ལ་མགོ་བོ་བཙུགས་ནས་བསྡད་པ་དང་གཉིད་སད། ཅི་ཡིན་ནམ་སྙམ་པས་སང་སྔ་ཐུན་གྱི་སྟེང་དུ་དཔོན་ས་ཉིད་ཀྱིས་ཇ་བཟང་གི་བཏུང་བ་དང་བཅས་ཆར་པའི་བྱིན་རླབས་བཀའ་དྲིན་ཆེ་ཞེས་རྨི་ལམ་ན་བྱུང་བའི་འབུལ་བ་རྣམ་གྲངས་གསུམ་ཙམ་དང་བཅས་པ་བྱུང་བས། དུར་ཁྲོད་མ་གསུམ་དེ་