[A:8]gsol ba btab bo/ /de nas se gol gtogs pas chu bo sngar bzhin babs te de'i tshe yang glu blangs so/ /rdzas rnams ko mkhan la byin pas ma 'dod par bor nas zhabs la 'jus nas rjes su gzung bar zhus pas gnang ste phyi bzhin 'brangs so/ /rdzas ni rtswa khyim pa rnams rang rang gis longs spyad do/ /de nas lho phyogs bi me sa ra dang nye ba'i gnas DA ki nI ta pa zhes bya bar chang 'tshong ma zhig gi khyim du byon nas dpon g.yog gnyis kyis chang nyo byas pas/ rin ci yod zer nas nged ngoms par gyis dang khyod ci 'dod pa sbyin gyi gsungs pas yid ma ches te ji tsam na ster zhes dris pas/ nyi grib kyi mtshams su ri mo re mdzad nas 'di song ma thag khyod la sbyin no zhes gsungs te/ nyi ma rting par bcug nas chang rnams zad pa dang rin slongs byas pas da dung nyi ma ma song gsungs/ de bzhin du yul khams bco brgyad kyi chang zad par gsol lo/ /de'i tshe rgyal po'i dbyu gu dang chu tshod la sogs pa'i rtsis thams cad kyang 'khrugs/ mi rnams kyang gnyid kyis ra ro ba lta bur gyur/ de nas rgyal pos rnal 'byor pas nus pa bstan par thos nas nyi ma gtang bar zhus pas/ nga la chang rin med gsungs te rgyal pos chang 'tshong ma rnams la chang rim byin pa dang mtshan phyed du gyur to/ /de'i tshe glu blangs te grags pa nyi ma dang mnyam par gyur to/ /de nas lho phyogs bi me sa ra zhes bya bar dbang phyug chen po'i lingga 'jim pa las byas pa yod/ de'i gnas na ral pa can lnga brgya yod pa'i yul de dag thams cad phyi rol pa yin pas/ de rnams sangs rgyas kyi bstan pa la gzud par bzhed nas der byon te de'i rgyal po la legs par sbyar ba'i skad kyis bstod sgra mang po btang bas rgyal po mnyes pas/ ral pa can lnga brgya'i dpon du bcug nas mchod gnas byas te rang gi sgrub pa snying por mdzad cing bzhugs pa'i tshe slob dpon gyis brgyad stong pa'i pusti la me tog gi phreng ba phul ba dang phyag