[A:༤༨༩]སོགས་དཀྱིལ་འཁོར་ཆེན་མོ་རྣམས་ལྕོགས་མདོག་མ་ཁ་བས་ཨྱོན་སྒྲུབ་པ་ཁོ་ན་ལ་དྲིལ་ལམ་དགོངས་པའི་ནུབ་ཅིག་མནལ་ལམ་དུ་ཀྱེ་རྡོ་རྗེའི་ཐུགས་ཀར་སློབ་དཔོན་ཆེན་པོ་བཞུགས་འདུག་པ་གསལ་བར་ཤར་བས་མནལ་སད་ཙ་ན་གཅིག་ཏུ་བསྒྲིལ་ན་མི་ལེགས་པར་མཁྱེན་ཏེ་མྱ་ངན་ལས་མི་འདའ་བའི་བར་དུ་ལམ་དུས་ཐུན་གཉིས་མ་ཆག་པར་མཛད་ཅེས་རྗེ་བཀའ་འགྱུར་བ་ཆེན་པོ་གསུང༌། ཤིང་ཕག་ལོར་རི་ཕུག་ནས་ཁྱབ་བདག་རིན་ཆེན་བསོད་ནམས་མཆོག་གྲུབ་ཀྱིས་མཇལ་བར་ཕེབས་དུས་གསུང་གླེང་མང་དུ་གནང་བའི་མཐར་ཕྱག་མཐེབ་ཀེར་ཏེ་རིན་པོ་ཆེ་ནུ་རོ་ལ་ཞེས་རྗེ་ཞ་ལུ་པའི་ཕྱག་ནས་འཇུས་འཕྲེང་ཚུལ་གྱི་ཆོས་དང་འབྲེལ་བའི་ཞལ་གདམས་མཐའ་ཡས་པ་གནང་ནས་དགྱེས་དགྱེས་མཛད། དེའང་རྗེ་བཙུན་རྡོ་རིང་པ་ཆེན་པོས་ཆོས་རྗེ་རྡོ་རྗེ་འཆང་གིས་ཀྱང་དོན་ལྔ་ལས་མ་བཞུགས་ཁོ་བོ་དོན་བདུན་གྱི་ཁར་སླེབས་བླ་མ་བདུན་ཅུ་རྩ་གཉིས་ཀྱི་ཐུགས་ཟིན་པ་སོགས་སྐུ་ཚེ་འདིའི་བཞེད་པ་མཐའ་དག་ལྷུན་གྱིས་གྲུབ་ནས་ཞིང་ཁམས་གཞན་དུ་གཤེགས་པ་ལ་སྤྲོ་བའི་ཚུལ་རྣམ་ཐར་དུ་གསལ་བ་དང་མཚུངས་པའི་དགུང་ལོ་ཡང་མཐུ་སྟོབས་ཀྱི་དབང་ཕྱུག་བསོད་ནམས་ཆོས་འཕེལ་དང་སྙོམས་པའི་དོན་བརྒྱད་དུ་ཕེབས་པ་དང་དེ་བར་རྒྱལ་བསྟན་སྤྱི་དང་བྱེ་བྲག་བདག་ཆེན་རྡོ་རྗེ་འཆང་བློ་གྲོས་རྒྱལ་མཚན་ཡབ་སྲས་བརྒྱུད་པར་བཅས་པའྀ་རིང་ལུགས་རྒྱལ་ཚབ་རིན་པོ་ཆེ་འཇམ་མགོན་བསོད་ནམས་མཆོག་ལྡན་གཙོ་བོར་གྱུར་པའི་བསྟན་འཛིན་རྣམས་ཀྱི་ཕྱག་ཏུ་ལེགས་པར་འཕྲོད་པས་རྔ་ཡབ་དཔལ་གྱི་རི་བོར་སངས་རྒྱས་གཉིས་པ་ཨྱོན་ཆེན་པོའི་འདུས་པའི་