[A:༤༩༠]འཁོར་གྱི་གྲལ་དུ་བསྒྲིག་པར་སྤྲོ་བ་དང་ཟླ་བ་གཅིག་ལས་གཟུགས་བརྙན་འབུམ་ཕྲག་མཚོ་རྫིང་དུ་འཆར་བ་ལྟར་དག་པ་དང་མ་དག་པའི་ཞིང་ཁམས་མཐའ་ཀླས་པར་སེམས་ཅན་གྱི་དོན་རླབས་པོ་ཆེ་མཛད་པར་དགོངས་ཏེ་འཛིན་བྱེད་ཅེས་པ་མེ་ཕོ་བྱི་བའི་ལོའི་ཆུ་ཤེལ་གྱི་དབང་པོ་སྨིན་དྲུག་གི་དགའ་མ་དང་རྩེ་བའི་དཀར་ཆའི་བཟང་པོའི་ཉི་མ་ནུབ་རིར་གཞོལ་བའི་ཚེ་གཟུགས་སྐུ་མཚན་དཔེའི་དཀྱིལ་འཁོར་ཆོས་སྐུའི་ཀློང་དུ་སྡུད་པར་མངོན་དུ་ཕྱོགས་པའི་རླུང་གི་འགྲོ་འོང་རྒྱུན་ཆད་པ་ན་ཁྱབ་བདག་བཀའ་འགྱུར་བ་ཆེན་པོས་སྐུ་ལ་འཇུས་ནས་གསོལ་འདེབས་གནང་བས་གསོས་པ་ལྟ་བུར་སྤྱན་ཧུར་གྱིས་གཟིགས་ཏེ་ད་ལྟ་རྡོ་རྗེ་འཆང་ཚར་པ་ཆོས་རྗེ་དང་ཐམས་ཅད་མཁྱེན་པ་གཉིས་བཀྲ་ལམ་གྱིས་ཕེབས་བྱུང་བར་རང་སེམས་བླ་མའི་ཐུགས་དང་དབྱེར་མེད་བདེ་བ་ཆེན་པོའི་ངང་ལ་ཆམ་མེར་འགྲོ་བ་དེ་སད་པ་ཞིག་བྱུང་ཕེབས་པ་མཁན་ཆེན་ཡོལ་བ་གཤེགས་གདོང་སྡེ་པ་དངོས་གྲུབ་རྡོ་རྗེས་གསུང་ཆེན་པོའི་གསོལ་འདེབས་ཀྱི་ཐུགས་དམ་སད་དེ། བཀའ་ལས། དེ་མིན་ན་སྟེང་གི་མཐོངས་དཀར་འགྲམ་འདིར་རིན་པོ་ཆེ་ཚར་པ་ཕེབས་བྱུང་བ་ལ་གསོལ་བ་བཏབ་པས་སྐུ་དེ་རྡོ་རྗེ་འཆང་དངུལ་ཆུའི་མདོག་ལྟ་བུ་ཞིག་ཏུ་གྱུར་པར་མཐོང་བའི་མོད་ལ་རིག་པ་ཐིམ་པ་བྱུང་བས་དེའི་ངང་དུ་སོང་ན་དོན་ཆེན་པོ་གྲུབ་པ་ལས་འགྱངས་ཏེ་ཞག་བཅུའི་བར་ནད་ཀྱིས་མནར་བའི་ལུས་འདི་ལ་སྡོད་དགོས་པར་འདུག །ཅེས་པ་དང་ཕྱོགས་མཚུངས་པའི་ཐུགས་དམ་སད་པར་སྣང༌། ལོ་གྲངས་དེ་ཙམ་ཞིག་ཁྱེད་ཀྱི་ཐུགས་དང་བསྟུན་ཡོད་ད་ཆ་དེ་འདྲ་མཛད་གཞན་འདྲ། འོན་ཀྱང་ཁྱེད་ལ་ལྟོས་བཅས་མཐའ་དག་བྱང་