[A:༤༨༦]གཡེངས་ཁྱེར་ཡ་མ་བརླས་བོར་བའི། །ཕ་ཆོས་གནས་གསར་བླ་མའི་བཀའ་དྲིན་ལས། །ཕ་རྒོད་ཀུན་དགའི་མཚན་ཅན་སྙིམ་པར་སོན། །ལོག་རྟོག་བ་ཚྭས་ཉེར་གང་ཆུ་ཀླུང་ཆེ། །སྙན་བརྒྱུད་རྀ་ཥིས་ཡན་ལག་བརྒྱད་ལྡན་དུ། །བསྐྲུན་པར་ཁ་འུའི་བྲག་ནས་སྟོབས་ཕྲོག་དབང༌། །དགྱེས་པས་བྲམ་ཟེའི་གཟུགས་ཀྱི་ཟློས་གར་བསྒྱུར། །རྡོ་རྗེ་སྲིན་པོ་གཟི་བྱིན་འབར་བའི་སྟེང༌། །རྗེ་བཙུན་བརྩེ་ཆེན་མངོན་སུམ་རབ་གསལ་བ། །ཁོ་བོས་བསྟན་པའི་མར་མེ་ཆེས་སྤར་བའི། །མེ་རོ་ད་གདོད་གསོས་ཞེས་གཟེངས་བསྟོད་སྙམ། །ཕྱག་ན་པདྨའི་དཀྱིལ་འཁོར་འཁོར་ལོ་རུ། །སྐྱེ་བདུན་ཤ་ལ་བརྟེན་པའི་སྒྲུབ་པ་ཡིས། །སྲིད་པའི་དུཿཁ་བཅིལ་བའི་མྱོང་གྲོལ་རྫས། །འདི་ཀོ་རིས་བྲལ་འགྲོ་སྲོག་འཚོ་བའི་སྨན། །དབང་པོའི་གཞུ་རིས་ཕུབ་པའི་ལྡིང་ཁང་ན། །ཕང་ཕུང་མནྡ་ར་བའི་འདབ་འཕྲེང་གཡོ། །སྔོན་མེད་དངར་བའི་དྲི་བཟང་རབ་འཐུལ་བ། །ཨ་ཧོ་ལེགས་བྲིས་མཆོད་པའི་རྣམ་འཕྲུལ་མཚར། །ངན་འགྲོའི་གཡང་ལ་གོམ་པ་ཡོངས་འཕྱན་པའི། །ཉམ་ངའི་འགྲོ་མང་ཐབས་མཁས་མཛད་པ་ཡིས། །འདྲེན་ཕྱིར་ཀཱ་ལ་ཤ་ནང་པད་དཀར་འཆང༌། །མངོན་སུམ་བྱོན་དེས་ཡིད་ཀྱི་གདུང་བ་སེལ། །ལེགས་ལྡན་དམར་ཟླུམ་སྤྱན་གྱིས་ཆིག་བརྒྱུད་སྣོད། །ཉེར་གཟིགས་ལུང་བསྟན་ཆོས་ཀྱི་རྒྱལ་ཚབ་ལ། །ཚར་ཆེན་བླ་མའི་གདམས་ངག་བུམ་པ་གང༌། །ཐུགས་གསང་ཟ་མ་ཏོག་བྱོ་དེ་རྨད་བྱུང༌། །འཇམ་མགོན་དགྱེས་པའི་མཁྱེན་རབ་མཁའ་ལྟར་ཡངས། །འཇིག་རྟེན་དབང་ཕྱུག་བརྩེ་བའི་རྗེས་སུ་འགྲོ། །ལག་ན་རྡོ་རྗེའི་མཐུ་སྟོབས་གཟི་འབར་