[A:༥༠༩]ལྡེའུ་བཙན་གྱི་སྐབས། རྗེ་སྲེག་པོ་ཁྱུང་བཞི་ལྷ་ཇོ་བོ་ལྕམ་དང་ལྔ། འབངས་ར་ཀློག་ཅན་དང་དྲུག །སེ་འ་ཞ་གཉིས་དང་བཅས་པ་རྣམས། ཆད་པ་མདོ་ཁམས་སྒང་ནས་ཆད། ཆགས་པ་གཡས་རུ་ཤངས་སུ་ཆགས་ཞེས་པ་རྣམས་གུངས་བསྒྲིགས་ན་གང་ཟག་རང་མཚན་པ་ཞིག་ལ་བཀར་ནས་རྒྱ་གར་ཕྱོགས་ན་ཡོད་ཚུལ་ཁུངས་དག་པར་མི་སེམས་ཏེ་བོན་དང་མུ་སྟེགས་མི་གཅིག་པས་ལོ་རྒྱུས་དེ་འདྲ་དྭགས་བརྒྱུད་པས་བོན་གྱི་རྗེས་སུ་འབྲངས་པའི་སྒྲུང་གི་བྱེ་བྲག་ཏུ་སྣང༌། སྤྱིར་འཛམ་བུ་གླིང་པའི་མི་རིགས་ཕྱི་བར་ནང་གསུམ་ལས། རྒྱལ་རིགས། རྗེ་རིགས། བྲམ་ཟེའི་རིགས། དམངས་རིགས་ཏེ་ཕྱི་རིགས་བཞི། རྒྱ་གར་ལྷ། རྒྱ་ནག་ཀླུ། ཧོར་ལྷ་མ་ཡིན། བོད་སྤྲེའུ་དང་བྲག་སྲིན་མོ་སྟེ་བར་གྱི་རིགས་བཞི། བཀའ་ཆེམས་བཀའ་ཁོལ་མར། སྤྲེལ་ཕྲུག་སྤུན་བཞི་བརྒྱ་པོ་དེ་ཚན་པ་བཞིར་འཐབས་པ་དང་མེས་པོས་བར་མཚམས་བྱས་ཏེ་ཞིང་ལ་ཆ་བཞིར་བགོས། གཅིག་ལ་གཅིག་འཇིགས་ནས་ཚན་བཞིར་ཆད་པས་སེ་དང༌། རྨུ་དང༌། ལྡོང་དང༌། སྟོང་སྟེ་ནང་མིའུ་རིགས་བཞི་རྣམས་བཅུ་གཉིས་པོ་རིགས་ཀྱི་ཕྱི་མོར་གྲགས། མིའུ་གདུང་དྲུག་ཏུ་དབྱེ་ན་བོད་མི་ཁྲི་ཐོ་ཆེན་པོ་བྱ་བ་དེ་ལ་དགྲ་འབྲུ་ལྡོང་ལྒ་དང་ནུ་བོ་དཔའ་རྡ་སྟེ་བུ་དྲུག་ཅེས་བཤད་སྤྱན་སྔ་ལྷ་གཟིགས་རས་པའི་ཡིག་ཚང་དུ། དགའ་ལྡོང་འབྲུ་གསུམ་དགྲ་དང་བཞི། །ནུ་བོ་དཔའ་མདའ་གཉིས་ཏེ་དྲུག་ཏུ་གསུངས། །ཚལ་པ་ཐམས་ཅད་མཁྱེན་པ་སི་ཏུ་དགེ་བའི་བློ་གྲོས་ཀྱི་ཧུ་ལན་དེབ་ཐེར་དུ་སྤྲེའུ་དང་བྲག་སྲིན་མོ་ལས་མཆེད་པ་