མདོ་མངས་ཐོར་བུ། དཀོན་བརྩེགས། ཕལ་ཆེན། ཤེར་ཕྱོགས་སྐོར་གྲུབ་ནས། དེ་ཡང་སྔར་ངོར་དུ་བསྒྲུབས་པ་གནང་བ་དེ་ཕྱག་ལེན་མཁན་སློབ་ཁ་སྐོང་ཚང་མ་ཁུངས་བཙུན་ནའང་ཤར་ཆེན་ཡེ་ཤེས་རྒྱལ་མཚན་གྱིས་ཡར་ཀླུངས་རྣམ་རྒྱལ་དུ་ཚག་མིག་མཁན་ཆེན་དཀའ་བཞི་ཚུལ་ཁྲིམས་རིན་ཅེན་ལ་བསྒྲུབས་པའི་སྡོམ་རྒྱུན་ཡིན་ལ། གོང་དཀར་རྡོ་རྗེ་གདན་གྱི་སྡོམ་རྒྱུན་ལ་ས་པཎ་བརྒྱུད་པར་བཞུགས་པ་དང༌། ཕྱོགས་དེའི་གདུལ་བྱ་རྗེས་འཛིན་ལ་དགོངས་ཏེ་སྨིན་དྲུག་ཟླ་བའི་ཚེས་ཉི་ཤུའི་གཟའ་ལྷག་པ་དང་སྐར་མ་རྒྱལ་འཛོམ་པའི་ཉིན་སྔ་དྲོ་སྡོམ་པ་འབུལ་བ་གནང་བའི་བརྡ་ཆད་ཙམ་དུ་ཙར་མོའི་སྟེང་ན་བཟའ་དཀར་པོ་ཞིག་བཞེས། ཕྱི་དྲོ་གནས་བརྟན་འདུལ་བ་འཛིན་པ་ཆེན་པོ་ཚུལ་ཁྲིམས་བཀྲ་ཤིས་བས་མཁན་སློབ་སྦྲགས་མ། གསང་སྟོན་སྐྱིད་ཚལ་འོག་མཁན་པོ་ངག་དབང་བསྟན་འཛིན། དུས་སྒོ་བ་རབ་འབྱམས་ཆོས་རྗེ་རིན་ཅེན་རྒྱ་མཚོ། ཁ་སྐོང་བ་བྲག་ཐོག་པ་ཤཱཀྱ་མཆོག་ལྡན་སོགས་དད་པའི་དགེ་འདུན་གྲངས་ཚང་བའི་དབུས་སུ་ཚིགས་སྔ་མ་དགེ་བསྙེན་ནས་བཟུང་སྟེ་སྡོམ་གསུམ་རིམ་གྱིས་མནོས་པའི་ཉི་མ་རི་རྐེད་ལ་ཡོད་དུས་བསྙེན་པར་རྫོགས་པའི་སྡོམ་པ་ཐུགས་རྒྱུད་ལ་བསྟར། དེ་ནས་ཞག་ལྔ་ཙམ་ན་འདུལ་ལུང་ཁྱིམ་པའི་སྤྱོད་ཡུལ་དུ་མ་འོས་ཤིང་རབ་བྱུང་ཤ་སྟག་དགོས་པ་ཆོས་སྡེ་གཉིས་ཀྱི་གྲ་རིགས་ཉི་ཤུ་སྐོར་གྱིས་ཉི་མ་གླིང་དུ་སྐུ་ངོ་སྦྲན་པས་རྗེ་ཚུལ་ཁྲིམས་བཀྲ་ཤིས་ཀྱིས་ད་ལམ་བསྐྱར་བཞེས་གནང་ནས་ཡུན་རིང་མ་སོང་ཡང་མཁན་པོའི་བྱ་བ་མཛད་དགོས་པར་གསོལ་བ་བཞིན་རྗེ་ཉིད་ཀྱིས་མཁན་པོ། མཚུངས་མེད་ཉི་མ་གླིང་པས་ལས་སློབ་བསྟར་ཏེ་རྩེས་དང་ཆེན་མོ་བྱང་མ་པ་ངག་དབང་བསྟན་འཛིན་གྱིས་གཙོས་པའི་བསྙེན་རྫོགས་པ་ཁ་ཤས་དང་རྡོ་རྗེ་བྲག་སྤྲུལ་སྐུ་རིན་པོ་ཆེ་དཔོན་སློབ་ལྔ་དགེ་ཚུལ་དུ་བསྒྲུབ་པ་གནང་བའི་ཆེན་མོ་བྱང་མ་པའི་མཚན་ལ་སླར་བྱམས་པ་བསྣན་ཏེ་འདོགས་པར་མཛད། ཆོས་ཞུ་བ་པོ་རྣམས་ཀྱིས་དཀྱིལ་འཁོར་ལ་བརྟེན་པའི་དབང་ཐོབ་གཤིས་གསང་སྒྲོག་གི་ཉེས་པ་མི་འབྱུང་ཡང་རྒྱུད་དང་འབྲེལ་པའི་ལྷའི་རིག་གཏད་ལྟ་བུ་བྱུང་ན་ཕྱག་ལེན་གཙང་བའི་དབང་དུ་མཛད་ཟུར་བཀའི་དཀྱིལ་འཁོར་ལ་རྗེས་གནང་གི་སྲོལ་མི་འདུག་རུང༌། སྒྲུབ་ཐབས་རྒྱ་མཚོའི་ཀྱེ་རྡོར། གསང་འདུས་འཇམ་རྡོར། ཧེ་རུ་ཀཿཕྱག་གཉིས་པ། བདག་མེད་མ། གཤིན་རྗེའི་གཤེད་དམར་ནག །ཕག་མོ་ལྷ་ལྔ། ཕྱག་རྡོར། མི་གཡོ་བ། སྤྱན་རས་གཟིགས་གཙོ་འཁོར་གསུམ་པ། གུར་མགོན། མགོན་པོ་ཕྱག་བཞི་པ། ཟུར་བཀའ་སྣ་ཚོགས་ཡུམ། ཁྲོ་ཕུའི་འཇམ་དཀར། ཕྱག་རྡོར་འགྲོ་བཟང་སོགས་སྤྱི་བཀའ་ཟུར་བཀའ་སྐབས་སུ་གང་བབས་ནས་རྒྱུད་སྡེ་ཚན་དུ་ཕྱེ་བ་ཕལ་ཆེར་དང་འབྲེལ་བར་སྔོན་དུ་རྗེས་གནང་རེ་མཛད་པའི་རྒྱུད་འབུམ་ནས་བདེ་མཆོག་མཁའ་འགྲོ་རྒྱ་མཚོ་ལ་སོགས་པའི་སྔགས་ཡས་མས་དཀྲུགས་པ་རྣམས་བསྡེབས་པས་མཚོན་མདོར་ན་ཆོས་བཤད་པའི་དུས་ཚོད་སྔ་ཕྱི་སོགས་གང་ལའང་ཐུགས་བྲེལ་གྱི་རྗེས་སུ་མི་འབྲང་ཞིང་དཔོན་སློབ་རྣམས་ཀྱི་ཀུན་ཏུ་སྤྱོད་པའང་མདོ་རྒྱུད་ལས། ཇི་ལྟར་བྱུང་བ་ལྟར་བསྟན་རྒྱུན་ལ་དགོངས་པའི་ཐུགས་རུ་ཤིན་ཏུུ་ང་བའི་སྒོ་ནས་ཆོས་སྡེའི་རིགས་གྲ་དང་རྣལ་འབྱོར་རྒྱུད་ཀྱི་སྒྲུབ་མཆོད་སོགས་ལ་རྟ་མ་ཆག་ཙམ་དང་གཞན་མ་ཉི་ཁྱོངས་སུ་གནང་བ་ཧོར་ཟླ་བཅུ་གཉིས་པའི་ཚེས་བཅོ་ལྔ་ལ་ལེགས་པར་གྲུབ་ཅིང་རྟེན་འབྲེལ་ཁྱད་ཀྱིས་བསྟན་འགྱུར་གསན་ཁྲོད་ནས་པོ་ཏི་གསུམ་ཙམ་དང༌། ཆོས་ཞུ་བའི་ཚོགས་ལ་ཉིན་རེ་བཞིན་མང་ཇ་གཉིས་རེ་ཆད་མེད་དང༌། ཀུན་མཁྱེན་བུ། རྗེ་རྡོ་རྗེ་གདན་པ། ཚར་ཆེན། འཇམ་དབྱངས་མཁྱེན་བརྩེ་ཁུ་དབོན་རྣམས་ཀྱི་དུས་དྲན་ལ་བཀའ་འགྱུར་རིན་པོ་ཆེར་རྒྱ་མཆོད། ཚོགས་སུ་མང་ཇ་འཕར་མ། སྐབས་འགར་ཆོས་སྟོན་མཛུག་ཏུ་གྲོལ་སྟོན་གྱིས་ཚིམ་པ་སོགས་བསྡུ་བ་རྣམ་པ་བཞིའི་སྒོ་ནས་རྗེས་སུ་བཟུང་ཞིང་གཉུག་མར་གནས་པ་དང་གློ་བུར་དུ་ལྷགས་པའི་ཁོང་ནས་རྡོ་རྗེ་བྲག་སྤྲུལ་སྐུ་རིན་པོ་ཆེའི་ཡབ་གཞིས་ནས་བསྙེན་བཀུར་གཟབས་རྒྱས་ལན་གཉིས། གཞན་ཕལ་ཆེར་གྱིས་མང་ཇའི་ཐོག་འབྱོར་པ་དང་བསྟུན་པའི་ཟང་ཟིང་གི་བདོག་པ་མཎྜལ་དུ་བཏེག