མཆོད་ཁང་དང་མགོན་ཁང་ཆེས་མང་བ་མཐའ་དག་མཇལ་བར་ཕེབས་པའི་ཚེ་དངོས་བཤམས་ཡིད་སྤྲུལ་གྱི་མཆོད་པ་དང༌། འཇིག་རྟེན་ཁམས་སུ་བདེ་སྐྱིད་རྒྱ་ཆེར་འབྱུང་བའི་སྨོན་ལམ་མཛད། ངེད་གོང་ནས་ཕྱིར་འཁོར་བའི་ཧོར་ཟླ་བཅུ་གཅིག་པའི་ནང་དུ་ངོས་འཕྲད་ལ་དགའ་ལྡན་ཕོ་བྲང་དུ་ཕེབས་ཏེ་ཐུགས་དགྱེས་པའི་གསུང་གླེང་བག་ཕེབས་པར་མཛད། བྱེས་ལམ་དུ་ཡུལ་དུས་གནས་སྐབས་ཀྱི་རང་དབང་འདུ་མི་འདུ་དང་གཙོ་བོར་ལེ་ལོ་དང་སྙིང་རུས་གཉིས་ཚོང་ཐེབས་པའི་ཁ་ཏོན་དགེ་སྦྱོར་བྱེད་བློ་རྣམས་མོས་འདུན་ཙམ་དུ་ལུས་གཤིས་ཆག་མེད་བཞི་གསོས་ཤིང༌། བསམ་མི་ཁྱབ་ཀྱི་བྱིན་རླབས། དེ་བཞིན་གཤེགས་པའི་ཡི་གེ་བརྒྱ་པ། ཕྱག་བཙལ་བའི་ཕན་ཡོན་འགའ་ཞིག །གདུགས་དཀར་གཞན་གྱིས་མི་ཐུབ་པ། འཇམ་དབྱངས་མཁྱེན་བརྩེས་མཛད་པའི་དྲི་མེད་ཀྱི་སྲོག་ཤིང་འཛུགས་ཆོག་རྣམས་ཀྱི་ལུང་དང༌། སྔར་གུང་ཐང་དུ་གནང་རྩིས་ཀྱི་གཏོར་གཤོམས་གྲུབ་མཚམས་གནམ་ངོ་ཆེན་པོ་གློ་བུར་དུ་བྱུང་བ་འོང་གསེབ་ཏུ་བཤོར་ན་དཔོན་སློབ་གཉིས་ཀར་སྐུར་འདེབས་བྱུང་དོགས་ཀྱི་གཤོལ་བ་གནང་འདུག་པ་ད་ལམ་ཞལ་གསང་འཁྲིད་དང་ཤིས་བསྟན་པའི་རྗེས་གནང་ཡང་ཞུས། རྗེ་བླ་མ་དམ་པར་བྱང་ལུགས་ཕྱག་ལེན་གྱི་ཚེ་དཔག་མེད་ལྕགས་སྡོང་བརྒྱ་རྩ། རིགས་འཛིན་རཏྣ་གླིང་པ་ཀློང་གསལ་གྱི་ཚེ་དབང༌། ཆོས་རྒྱལ་བཀྲ་ཤིས་སྟོབས་རྒྱལ་གྱི་མཚོ་སྐྱེས་རྡོ་རྗེ་སྐུ་གསུམ་རིགས་འདུས་ཀྱི་དབང་ལུང་རྣམས་ཕུལ་ཞིང་གཏེར་གསར་གྱི་ཚེ་མདའ་རྩེ་སོར་གསུམ་ཙམ་འཕེལ་བས་སྐུ་ཚེའི་རྟེན་འབྲེལ་འགྲིག །རྒྱ་ནག་ནས་འཁོར་བའི་སྐྱེས་མ་དང་ཆོས་ཡོན་སྦྲགས་པའི་མཎྜལ་རྒྱས་པར་བཏེག་ཅིང་ཡར་ལམ་གུང་ཐང་དུ་ཞག་ཤས་བཞུགས་ཏེ་རིམ་གྱིས་བཀྲ་ཤིས་རྩེ་ཆོས་སྡེར་ཐེགས། ད་དུང་ཚེ་འདིའི་ཆེ་ཐབས་བསྒྲུབས་ཀྱང་འགྲུབ་པར་དཀའ་ཞིང༌། །གྲུབ་ཀྱང་སྐྱིད་མོད་ངང་ནས་གནས་ངན་དུ་མར་འཁྲིད་པས། །ཅི་བྱས་དམ་པའི་ཆོས་དང་ཡང་ཡང་རྗེས་སུ་བསྟུན་ནས། །ཆོས་བརྒྱད་སྤོང་བའི་ཐབས་ལ་འབད་པ་བགྱིད་པ་མ་གཏོགས། །ཚེ་འདིའི་མདུན་མ་སྒྲུབ་པའི་ཞེ་འདོད་མེད་པ་ཞིག་གདའོ། །ཞེས་རྗེ་ཐམས་ཅད་མཁྱེན་པའི་གསུང་མགུར་ལས་བྱུང་བ་ལྟར། ལོ་སྔོན་མ་འབྲས་སྤུངས་སུ་ཕེབས་སྐབས་གསུང་གླེང་ལ་ད་ཆ་ལོའང་མང་དུ་ལོན་ཅིང་དེ་བར་སྡེ་དགོན་གྱི་ཁ་འཛིན་སོགས་བན་བུན་གྱི་གཡེང་བའི་ངང་དུ་ཟད་པ་ཞིག་བྱུང་བ་ཚེ་མཇུག་འདི་ལ་དབེན་པ་བསྟེན་ནས་དགེ་སྦྱོར་ལ་ཆིག་སྒྲིལ་བྱེད་འདུན་ཡོད་གནང་བར་ད་དུང་དགུང་ལོ་སོགས་ཧ་ཅང་གི་མཐོ་བར་མ་ཟིན་ཅིང་སྐུ་གཟུགས་ཀྱིས་རྐྱེན་མི་ཐེག་པའང་མི་འདུག་པས་རེ་ཞིག་སྤྱི་སྒོས་ཀྱི་ཆོས་རྒྱུན་སྤེལ་བས་མཚོན་པར་ཐུགས་ལས་ཆུང་ངུར་མ་སོང་བ་དགོས་ཚུལ་ཞུས་ཤིང་ཤིང་རྟ་ཆོས་སྡེ་པ་ཚོར་དེ་མཚུངས་ཀྱི་བསླབ་སྟོན་གནང་བར་གྲ་རིགས་སྦྱིན་བདག་སྐྱ་སེར་ཐམས་ཅད་ཀྱིས་མགྲིན་གཅིག་ཏུ་གསོལ་བ་བཏབ་པ་སོགས་གང་ཅི་ནས་ཐུགས་དབང་མ་འདུས་པར་བརྟེན་ད་ཆ་ཚེ་དང་སྒྲུབ་པ་མཉམ་པ་མ་ཐུབ་ཚེ་གཡེང་བ་བྱེད་རིན་ཆོག་པ་བགྱིད་གསུང་ཐོག་བབས་སུ་བཀའ་འགྱུར་བཞེང་བའི་དགོངས་པ་བསྟད་ནས་ཤོག་བུ་སྒྲུབ་པའི་སྟ་གོན་དུས་སྡེ་པ་བློ་བཟང་མཐུ་སྟོབས་ཀྱི་གཅུང་གསུང་རབ་རྒྱ་མཚོས་སྣག་ཚ་དང་སྨྱིག་རྒྱུའི་སིག་ཕུལ་བས་རྟེན་འབྲེལ་འགྲིག་ཅེས་དགྱེས་པར་གྱུར། ཤོག་བུ་སྒྲུབ་མི་སླེབས་པ་དང་མོན་ནས་ཤོག་ཚོང་པ་གཏོས་ཅན་ཡོངས་པ་འགྲིག་པས་གནས་པོ་ཡང་དུས་གཅིག་ལ་བཀའ་འགྱུར་ལྡངས་འདི་འདྲ་ཡོང་བ་ཐུགས་རྗེ་རང་དུ་གོ་བའི་དད་པ་ལྷག་པར་སྐྱེས་ཏེ་འབྲས་ཀྱི་སྐྱེས་ཕུལ་ཞིང་སྲུང་བ་ཞུས། ལ་ལ་དག་ཐུགས་རིག་ལ་སྟེང་ཤོད་མེད་དམ་ཕྱག་རྫས་སྟོབས་ཆེ་བ་མེད་པར་ཐུགས་གྲ་འདི་འདྲ་བསྒྲིག་ཞེས་ཐུགས་ལྷུས་མ་ཐིངས་པའི་སྐུར་ཞུས་བྱེད་པ་བྱུང་ནའང་རྒྱལ་བ་ཙོང་ཁ་པ་ཆེན་པོས་རྫིང་ཕྱིའི་ཞིག་གསོས་ཀྱི་ཚེ་དཔོན་སློབ་བཅུ་གཉིས་ཀྱི་སྐུ་ཆས་ལ་ཟི་གོང་བརྒྱབ་པར་གསེར་ཞོ་བཅུ་གཉིས་ལས་མ་བྱུང་བ་དེ་ནུབ་རྣམ་སྲས་ལ་འཛིན་གཏོར་ཞིག་གནང་བས་སང་ནས་ཡོ་བྱད་འབད་མེད་དུ་བྱུང་ཞིང་ཐམས་ཅད་མཁྱེན་པ་དགེ་འདུན་གྲུབ་པ། ངོར་ཆེན་རྡོ་རྗེ་འཆང༌། པཎ་ཆེན་ཤཱཀ་མཆོག་པ་ལྟ་བུའང་སྙོམས་ཆུང་བྱ་བྲལ་གྱི་ངང་ནས་བཀྲ་ཤིས་ལྷུན་པོ།