ཨེ་ཝཾ་ཆོས་ལྡན། གསེར་མདོག་ཅན་གྱི་ཆོས་སྡེ་བཏབ་པས་མཚན་འཕགས་བོད་ཀྱི་གང་ཟག་ཁྱད་པར་ཅན་རྣམས་གནས་སྐབས་སུ་འདོད་ཡོན་ལ་མི་དགྱེས་པས་གསོག་འཇོག་མི་མཛད་ཀྱང་ཆོས་ལྡན་གྱི་མཛད་པ་རྒྱ་ཆེན་པོའི་དུས་ནམ་མཁའ་མཛོད་ལ་མངའ་འབྱོར་བའི་ཤུགས་ཀྱིས་འབད་རྩོལ་ལ་མི་ལྟོས་པའོ། །འཇིག་རྟེན་མཐུན་འཇུག་ཟང་ཟིང་བདོག་པ་ལ། །ཕན་ཚུན་སྐྱེས་སུ་བསྟར་བ་དོན་ལྡན་དུ། །བྱེད་པའི་ངང་ཚུལ་མཐོང་ན་དམ་ཆོས་ནོར། །གཏོང་ལེན་འདི་ཀོ་དམ་པའི་རྣམ་པར་ཐར། །སྔོན་འདུས་ལོ་པཎ་མཁས་གྲུབ་མང་བྱོན་ནས། །རྒྱལ་བསྟན་དར་ཚེ་རྩོལ་བར་ཅི་ཞིག་ལྟོས། །འཆད་ཉན་དགུན་གྱི་ཆུ་བྲན་ལྟར་གྱུར་དིང༌། །ཐོས་བསམ་ཁུར་གྱི་ལྗིད་ལ་ལྷག་པར་རངས། །སྔ་ཕྱིར་འགྱུར་བའི་སྨིན་གྲོལ་མན་ངག་ལུང༌། །པདྨའི་སྐུད་པར་རྡོ་རྗེ་བཞུ་བླུགས་པས། །སྲོག་འཚོའི་རིག་བྱེད་དྲན་པའི་མཁྱེན་དཔྱོད་ཀྱི། །ཚངས་རིས་གྲུབ་པའི་ལྷ་དེ་གཞན་མིན་དྲང༌། །སྤྲུལ་ཞིང་ལྟ་ན་སྡུག་ནས་འོངས་མིན་པར། །སྐྱེ་རྒུའི་སྲོག་འཚོ་སྨན་གྱི་བླ་མ་དངོས། །གིང་ཆེན་ཚངས་པས་བསྙེམས་བཏང་གང་གི་ཞབས། །ནམ་མཁའི་སྙིང་པོར་ངེས་ཏེ་གཙུག་ཏུ་བླངས། །ལྷ་མིན་དམོད་པའི་ལྕགས་ཏིམས་མ་སྐྱེས་པར། །གཟུར་གནས་བློ་ཡི་དཔལ་བེའུ་སྙིང་ག་རུ། །རི་མོ་རབ་བཀྲའི་སྐལ་ལྡན་ནབས་སོ་སྐྱེས། །ཁྱོད་ཞལ་བདུད་རྩི་འཐུང་ལ་ལྷག་པར་རིངས། །རྣམ་གསུམ་ཆོས་འཁོར་དུས་གཅིག་ཡོངས་བསྐོར་བར། །དཀར་ཕྱོགས་ལྷ་རྣམས་དགའ་མགུར་ལྟ་བ་ལ། །མནྡ་ར་ཡི་སྨིན་ལེགས་ཕྲེང་མཛེས་དང༌། །ཁོར་ཡུག་དབང་གཞུའི་དྲ་བས་སྦྲེལ་ཕྱིར་བརྫུ། །གཡས་རུའི་འཛིན་མར་འཁྲུལ་མེད་ལམ་སྟོན་ཤེས། །ཉུང་ཟད་ཙམ་ཡང་མ་བཟོད་ལུས་མེད་མདས། །རེ་ཞིག་བཞེད་པའི་དཀའ་ཐུབ་འཇིག་ནུས་པ། །ཆེས་ཆེར་ལྔ་བདོའི་ཤུགས་དེ་གང་གིས་བཟློག །འདམ་སྐྱེས་འདམ་གྱིས་མ་གོས་པདྨ་ལྟར། །འཁོར་ནས་འཁོར་བའི་རྒྱ་ལས་ཡོངས་གྲོལ་ཡང༌། །སློབ་ལམ་སློབ་པའི་ཆེད་དུ་ཞི་བདེ་ལ། །ངེས་པར་ངེས་འབྱུང་ཚུལ་གྱིས་འདྲིད་དེ་ཅི། །ནམ་མཁའི་སྐ་རགས་མ་དེས་འཆིང་དཀའ་བའི། །གྲངས་མེད་འགྲོ་འདྲེན་ཐུགས་བསྐྱེད་རྡོ་བའི་ངོས། །བྲིས་པའི་རི་མོ་སེམས་ཅན་ཟད་པའི་མཐའ། །དེ་སྲིད་མི་ཡལ་རྒྱལ་སྲས་སྤྱོད་པའི་གཤིས། །མྱོས་བྱེད་ཅེས་པ་ཤིང་ལུག་ཟླ་བ་གསུམ་པའི་ཚེས་དགུ་ལ་ཆོས་སྡེ་ཆེན་པོ་དཔལ་ལྡན་འབྲས་སྤུངས་སུ་ཕེབས་པའི་ཞར་བྱུང་དུ་གྲ་དར་རྒྱས་ཆོས་སྡིངས་སུ་གདན་གྲངས་ཡབ་རྗེ་གནུབས་ཆེན་སྤྲུལ་པའི་ཟློས་གར་དང་གདུང་བརྒྱུད་བགྲེས་པ་ཆོས་རྒྱལ་གཏེར་བདག་གླིང་པ་གཉིས་ལ་དཔལ་ཀྱེ་རྡོ་རྗེ་མན་ངག་ལུགས་དང་ཛེ་ཏཱ་རིའི་ཚེ་དཔག་མེད་ལྷ་དགུའི་དབང་གནང༌། ཚུར་རིག་འཛིན་ཕྲིན་ལས་ལྷུན་གྲུབ་ལ་གཏེར་ཆོས་ཅི་རིགས་པ་གསན་ཏེ་རིམ་གྱིས་དགའ་ལྡན་ཕོ་བྲང་དུ་ཞག་དགུའི་བར་སྟན་ཆགས་པའི་དུས་འཁོར་བདག་པོ་ཆེན་པོའི་དབང༌། སིནྡྷུ་ར་ལ་བརྟེན་པའི་བདག་མེད་ལྷ་མོ་བཅོ་ལྔ། བདེ་མཆོག་དཀར་བོ། ཏོག་ཙེ་བའི་བསམ་མི་ཁྱབ་གསུམ་གྱི་བྱིན་རླབས། ཨཥྟའི་བཟླས་ལུང༌། གུར་སྤྲིན་གསེབ་མའི་རྗེས་གནང༌། སུམ་པ་ལོ་ཙཱའི་བློ་སྦྱོང་དང་ཚེམ་བུ་ལུགས་ཀྱི་དམར་ཁྲིད་གཉིས་འཇམ་དབྱངས་མཁྱེན་བརྩེའི་ཟིན་བྲིས་སྟེང་ནས་ཉམས་འཁྲིད་སྔ་དགོངས་སོ་སོར་སྨིན་རྒྱས། རྗེ་བཙུན་གྲོལ་མཆོག་གི་འཁྲིད་བརྒྱའི་སྐོར་ཡོངས་རྫོགས། དམ་ཆོས་དགོངས་པ་ཡང་ཟབ་ཀྱི་ཆོས་སྐོར་ཕལ་ཆེར། བསྟན་གཉིས་གླིང་པའི་རྟ་གླུད། ཀྱེ་རྡོར་དབང་ཆོག་གི་ལྷན་ཐབས་ཚར་ཆེན་གྱིས་མཛད་པ། དེའི་སྦྱིན་སྲེག་དང་སཱཙྪ་འདེབས་ཆོག་ཀུན་མཁྱེན་མཁྱེན་བརྩེས་མཛད་པ། རྗེ་ཉིད་ཀྱིས་མཛད་པའི་བྱང་གཏེར་སྐྱེ་བདུན་སྒྲུབ་ཐབས། སམྦྷུ་ཊ་རྒྱུད་ཕྱི་མ་དང་བཅས་པ། གསང་བ་རིང་བསྲེལ། བྱང་ཆུབ་རྒྱན་འབུམ། ལས་སྒྲིབ་རྣམ་སྦྱོང༌། རྟེན་འབྲེལ་སྙིང་པོ། འོད་ཟེར་ཅན་མ། དུག་སེལ་མ། གདུགས་དཀར་མཆོག་གྲུབ། རྣམ་རྒྱལ་མའི་གཟུངས་རྟོག་པ་དང་བཅས་པ། ངན་འགྲོ་སྦྱོང་བའི་རྣམ་རྒྱལ། གཙུག་ཏོར་དྲི་མེད། མཆོད་པའི་སྤྲིན་གྱི་གཟུངས། རྒྱལ་མཚན་རྩེ་མོའི་དཔུང་རྒྱན། མིག་ནད་སྦྱོང་བ། གཞང་འབྲུམ་ཞི་བ།