དེ་ཡང་རྣམ་ཐར་གྱི་ས་བོན་ལ་ལོ་ཚིགས་ཞིབ་ཆ་ཡོད་མེད་སྣ་ཚོགས་དང་ཡོད་པ་ལའང་སྣང་ལ་མ་ངེས་ཀྱི་དཔྱད་མི་བཟོད་པ་འགའ་མཐོང་ནའང་བླ་མ་རགས་རིམ་གོང་སྨོས་ལྟར་ཡིན་ལ། ཞིབ་ཏུ་མ་འཚལ་བར་ཕྱོགས་གཅིག་ཏུ་བསྡོམས་པར་རྩེ་གདོང་ཁྲི་ཆེན་ཀུན་དགའ་བསོད་ནམས་ལྷུན་གྲུབ་བཀྲ་ཤིས་གྲགས་པ་རྒྱལ་མཚན། ས་སྐྱ་སྒར་ཆེན་མཐུ་སྟོབས་དབང་ཕྱུག །ས་སྐྱ་ཁྲི་ཆེན་ངག་དབང་ཀུན་དགའ་བསོད་ནམས་བཀྲ་ཤིས་གྲགས་པ་རྒྱལ་མཚན་དཔལ་བཟང་པོ། དེ་སྲས་ཀུན་དགའ་བསོད་ནམས་དབང་ཕྱུག །ལྕམ་རྗེ་བཙུན་མ། ཞྭ་དམར་མཆོག་གི་སྤྲུལ་སྐུ། ར་ལུང་ཞབས་དྲུང་མི་ཕམ་བསྟན་པའི་ཉི་མ། སྒེར་པའི་རིན་པོ་ཆེ་ཉི་མ་བ། སྔགས་འཆང་ཚེ་རིང་དབང་པོ། ཆོས་རྗེ་འོད་མཆོག་པ། ཆོས་སྡེའི་ཟུར་འཆད་པ་ཀུན་བཟང་རྩེ་པ་ཀུན་དགའ་བཀྲ་ཤིས། ཆོས་རྗེ་མི་ཕམ་བློ་གྲོས་སོགས་ཀྱིས་མཚོན་པ་རྣམས་ལ་སྔགས་གསར་རྙིང་གི་དབང་རྗེས་གནང་འཁྲིད་ལུང་སྡེ་སྣོད་གསུམ་གྱི་ཆོས་ཚུལ་མང་དུ་གསན་པ་དང་ཆེས་ཉུང་བ་ལ་ལར་བླ་མའི་རྣལ་འབྱོར་ཚེ་དབང་ཚིགས་བཅད་རེ་གསན་པ་ཡན་ཆད་ལ་འབྲོམ་གྱིས་སེ་བཙུན་དང་མི་ལས་མར་པ་བསྟེན་པའི་རྣམ་ཐར་བཞིན་མཉེས་པ་གསུམ་གྱི་སྒོ་ནས་གུས་པ་ལྷུར་ལེན་པ་ལས་ལོག་སྒྲུབ་དང་བླ་མའི་སྐྱོན་ཕྲ་མོ་ཙམ་ཡང་མི་འཚོལ་ཞིང་ཐམས་ཅད་ཡོན་ཏན་དུ་འཆར་བ་ལོ་ཆེན་འབྲོག་མིས་གསང་སྔགས་ཀྱི་ཆོས་ཟབ་པའི་བརྡར་བདག་མེད་མའི་དབང་རྫོགས་རེ་ལ་འབྲི་བཅོ་ལྔ་དང་ལྷ་མོ་རལ་གཅིག་མའི་རྗེས་གནང་རེ་ལ་འབྲི་གཡག་རེ་དགོས་ཀྱི་ཡོད་ཚུལ་མར་པའི་རྣམ་ཐར་དུ་གསལ་བ་ལྟར། བླ་མ་དང་ཆོས་ཀྱི་ཆེ་བ་འདོན་སླད་དུ་སྲི་ཞུ་ཁོ་ན་མཛད་ཅིང་ཆོས་གསན་པ་ཚོར་ཡང་ཐོས་ལོ་བྱུང་ལོའི་མིང་ཙམ་ལ་མི་འཆེལ་བར་རྒྱ་བོད་ཀྱི་གྲུབ་མཐའ་སོ་སོའི་བཞེད་ཚུལ་གྱི་ཕྱག་ལེན་དང་བཤད་ཐབས་མཐའ་དག་ཡོད་རྒྱུ་བ་དང་ཤེས་རྒྱུ་བའི་ཟག་ཟོག་སྦུབ་ལྡིར་གྱི་རྫོང་གོག་ཡེ་མི་འཛིན་པར་མཁྱེན་དཔྱོད་རྣམ་པར་དག་པས་དཔྱད་བཟོད་ཁོ་ནར་གནང་སྟེ་དཔེར་ན་རྔོག་ལུགས་དང་ས་ལུགས་ཀྱི་དབང་གི་དྲིལ་བུ་དཀྲོལ་ལུགས་ཀྱི་མཐའ་བརྟེན་པ་སྤུ་རིས་ཕྲ་མོ་ཙམ་ཡང་མ་འདྲེས་པ་སོ་སོར་དབྱེ་ལ། རིས་མེད་པའི་ཆོས་ཀྱི་རྒྱུན་དང་གདུལ་བྱའི་ཁམས་དང་བསམ་པ་ཐ་དད་པའི་དབང་གིས་གསན་པ་རྒྱ་གང་ཆེར་གནང་བ་ལས་གཙོ་བོར་ཐུགས་ཉམས་བཞེས་སུ་དགོས་པ་དག་བྱས་སོ་བྱུང་ངོ་ཙམ་མ་ཡིན་པའི་ཡི་དམ་ལྷའི་ཞལ་མཐོང་བ། གསུང་གིས་གནང་བ་ཐོབ་པ། དམ་ཅན་བྲན་དུ་བཀོལ་བ། རྫོགས་རིམ་གྱི་ལམ་ལ་དྲོད་ཐོབ་པ་མཛད་ཅིང་གཞན་དག་ཀྱང་གསན་པ་ཙམ་དུ་མ་ལུས་པར་སོ་སོར་བློ་དང་འཚམ་པར་རྒྱ་ཆེར་སྤེལ་བའི་ཞལ་སློབ་ཀྱི་གྲངས་ཐམས་ཅད་བརྗོད་པ་ལྟ་ག་ལ་ཞིག་བསྟན་པ་འཛིན་པའི་བཤེས་གཉེན་རགས་བསྡུས་ཙམ་བརྗོད་ན། དཔལ་ཞ་ལུ་གསེར་བཀང་གི་གདན་ས་པ་ཁྱབ་བདག་རིན་ཅེན་བསོད་ནམས་མཆོག་གྲུབ། གླང་ཕུ་ཆོས་རྗེ་འཇམ་དཔལ་ཆོས་སྐྱོང་དབང་ཕྱུག །ཟུར་ཐམས་ཅད་མཁྱེན་པ་ཆོས་དབྱིངས་རང་གྲོལ། ཁྲ་ཚང་པ་ཆེན་པོ་ཁྱབ་བདག་བློ་མཆོག་རིག་པའི་རྡོ་རྗེ། རྡོ་རྗེ་བྲག་ནས་རིགས་འཛིན་མཆོག་སྤྲུལ་པདྨ་འཕྲིན་ལས། རྒྱལ་རྩེ་བདག་པོ་བྱམས་པ་ངག་དབང་བསོད་ནམས་རྒྱལ་མཚན། ངོར་མཁན་པོ་ཐར་རྩེ་ནམ་མཁའ་རིན་ཅེན་ཨེ་ཝཾ་མཁན་ཆེན་དཔལ་གླིང་པ་བསོད་ནམས་རྒྱལ་མཚན། བྱེ་རྫིང་ཚོགས་མཁན་པོ་སངས་རྒྱས་དཔལ་བཟང༌། གསུང་སྤྲུལ་ཚུལ་ཁྲིམས་རྡོ་རྗེ། བང་རི་གཏེར་སྟོན་ཧཱུྃ་ནག་མེ་འབར། སྐྱེད་ཚལ་གོང་མཁན་པོ་བྱམས་པ་ངག་དབང་བསྟན་འཛིན། སྐྱེད་ཚལ་འོག་མཁན་པོ་ངག་དབང་བསྟན་པ། དར་རྒྱས་ཆོས་སྡིངས་པ་རིགས་འཛིན་འཕྲིན་ལས་ལྷུན་གྲུབ། དེ་སྲས་སྤྲུལ་སྐུ་གཏེར་སྟོན་ཆེན་པོ་འགྲོ་འདུལ་གཏེར་བདག་གླིང་པ། རིགས་འཛིན་ཆོས་དབང་ཀུན་བཟང༌། རྗེ་དཔལ་འབྱོར་གླིང་པ་ངག་དབང་རྣམ་རྒྱལ། མཚུངས་མེད་ཉི་མ་གླིང་པ་རིན་ཅེན་ཚུལ་ཁྲིམས་བཀྲ་ཤིས། ཀུན་བཟང་རྩེ་པ་པཎ་ཆེན་བསོད་ནམས་མཆོག་ལྡན། རྗེ་ཀུན་དགའ་བཀྲ་ཤིས། རབ་འབྱམས་ཆོས་རྗེ་རིན་ཅེན་རྒྱ་མཚོ། མདོ་པ་ཆོས་རྗེ་དགེ་བའི་དབང་པོ། ཤར་ལུང་རབ་འབྱམས་པ། དགེ་སློང་འཕྲིན་ལས་རྣམ་རྒྱལ་སོགས་རྡོ་རྗེ་གདན་སློབ་དཔོན་དང་ཟུར་འཆད་པ་ཚང་མ།