[A:༥༥༡]བཀྲ་ཤིས་དང་བཞི་བལྟམས་པའི་གཅེན་རྡོ་རྗེ་འཆང་དབང་ཕྱུག་རབ་བརྟན་གྱི་རྣམ་པར་ཐར་པ་ལོགས་སུ་འབྲི་བར་སྤྲོ་བས་འདིར་མ་བཀོད། ནམ་མཁའ་ཚེ་བརྟན་དང་ནམ་མཁའ་བཀྲ་ཤིས་གཉིས་ཀྱང༌། ལེགས་བཤད་རིན་པོ་ཆེ་ལས། ཕལ་ཆེར་བུ་ཚའི་སྤྱོད་པ་ནི། །རིགས་བརྒྱུད་སྔ་མའི་རྗེས་སུ་འགྲོ། །ཁུ་བྱུག་ཕྲུག་གུ་རྒྱ་ཁྲ་རུ། །འགྲོ་བ་རྒྱལ་ལམ་སྲིད་པ་ཙམ། །ཞེས་ཡབ་མེས་གོང་མ་རྣམས་ཀྱི་ཆས་ཀྱིས་དཔའ་ཞིང་བསྒྲིགས་ཀྱིས་ཆེ་བ་སོགས་ལུགས་གཉིས་ཀྱི་སྤྱོད་ཚུལ་མཐའ་དག་ཡ་རབས་བཟང་པོའི་ངང་ཚུལ་ཁོ་ནར་བྱུང་ལ། ཁྱད་པར་འ་ཞ་ནམ་མཁའ་མགོན་པོའི་ཁབ་ཏུ་མངའ་རིས་གོང་མའི་བླ་སྨན་པ་འ་སྲས་པའི་སྲས་མོ་ཚེ་དབང་བསོད་ནམས་དཔལ་མོ་བསུས་པའི་ཡབ་ཡུམ་གཉིས་ཀའང་ཆེ་བཙུན་གདུང་གིས་མཐོ་བའི་ངང་ཚུལ་དང་ལྡན་ཞིང་ཚེ་འདིའི་དོན་དུ་གཏན་མདུན་རྒྱབ་ཏུ་བསྐྱུར་བའི་གྱ་གྱུའི་ངན་སྤྱོད་ཡེ་མི་མཛད་པར་རྗེ་ལ་གུས་ཤིང་འབངས་ལ་བྱམས་པ་ངོ་ཚ་ཤེས་ཤིང་ཁྲེལ་གཞུང་གི་བག་ཡོད་པ། བསོད་ནམས་ཀྱི་ཞིང་དཀོན་མཆོག་གསུམ་ལ་མཆོད་པ་དང་མ་ནུས་པར་སྦྱིན་གཏོང༌། དཔལ་ལྡན་བླ་མ་དམ་པ་རྣམས་ཀྱི་ཞབས་རྡུལ་བསྙེན་ནས་གསང་ཆེན་ཟབ་མོའི་ཉམས་བཞེས་ལ་ལྷོད་པ་མི་མངའ་བས་ཕྱིའི་ལྟར་སྣང་གི་ཆ་ལུགས་གཅིག་ཀྱང་དིང་སང་གི་སྡེ་དཔོན་དུ་གྲགས་པ་རྣམས་ཀྱིས་དཔེ་ཟླར་མི་འོས་པ་ཞིག་ཡིན་ལ། ཡབ་ཡུམ་དེ་གཉིས་ཀྱི་སྲས་སུ་ནམ་མཁའ་བསོད་ནམས་རབ་བརྟན་དང་གཅུང་ནམ་མཁའ་དོན་གྲུབ་དབང་པོ་