[A:༥༥༩]བྱིས་པ་གཞན་རྣམས་གྲ་པའི་ཚུལ་དུ་མཛད་དེ་ཆོས་འཆད་པའི་རྣམ་པ། ངའི་མིང་ལ་བཙུན་ཆུང་ཚུལ་ཁྲིམས་ཟེར་གསུང་པ། མདོས་གཏོར། ཆོ་ག །བསྐང་བས་མཚོན་པའི་ལད་མོ་སོགས་བསྐྲུན་པ་སྐུ་སྐྱེ་བ་མང་པོར་འཁོར་ལོ་གསུམ་གྱི་བྱ་བ་ལ་རྟག་འགྲུས་སུ་གནང་བའི་བག་ཆགས་ཀྱི་མཐུ་བརྟས་པ་ཡིན་ཅིང་དུས་ཕྱིས་སྐུ་རིམ་ལ་དགོས་པའི་འཇིམ་པ་སྔར་ཤུལ་ནས་བཙལ་ཀྱང་ལར་མ་རྙེད་པས་བཀའ་ལས་ངེད་ཆུང་ངུའི་དུས་སུ་བློ་བྲིད་ཀྱི་རྩེ་མོའི་ཆེད་དུ་གཞི་བདག་གིས་བྱིན་པ་ཡིན་འདྲ་གསུང༌། མདོར་ན་ཀུན་སྤྱོད་མཐའ་དག་ཆོས་དང་མཐུན་པའི་རྣམ་འགྱུར་མ་གཏོགས་བྱིས་པ་ཐ་མལ་པའི་ངང་ཚུལ་ཡེ་མི་མཛད་པས་ཐུགས་སྒམ་པའི་ཚད་ཐུབ་པར་གླེང༌། དགུང་ལོ་ལྔ་དྲུག་ཙམ་ལ་ཡུམ་གྱིས་སྙན་བད། གོང་རྣ། སོར་གདུབ་སོགས་ཕུལ་བར་མི་དགྱེས་ཤིང་འདོགས་པར་མི་མཛད་པ། རྡོ་རྗེ་འཆང་ཚར་པ་ཆོས་རྗེས། ལ་ལ་བ་ལང་ཇི་བཞིན་སྤྱོད། །ཁ་ཅིག་བྲམ་ཟེའི་རྣམ་ཐར་སྐྱོང༌། །ཁོ་བོ་ཉན་ཐོས་སྤྱོད་པས་མཛེས། །ཤུགས་འབྱུང་སྐྱོང་བ་བླ་མའི་དྲིན། །ཞེས་པའི་དོན་བཞིན་ཡང་སྲིད་དུ་མར་ཉན་ཐོས་ཀྱི་བསླབ་པ་ལ་གནས་པའི་བག་ཡོད་ཀྱི་ངང་ཚུལ་ཉམས་སད་པས་ཁྱིམ་པའི་རྟགས་དང་ཆ་ལུགས་སོགས་ལ་ཐུགས་མི་གཞོལ་བར་གནས་བརྟན་འདུལ་བ་འཛིན་པ་ཆེན་པོ་འབྱུང་བའི་སྔ་ལྟས་སོ། །དགུང་ལོ་བདུན་གྱི་སྟེང་དུ་གངས་རིའི་ལྗོངས་འདིར་ཐུབ་བསྟན་ཡོངས་སུ་རྫོགས་པའི་ཤིང་རྟ་པ་ཆེན་པོ་མ་བྱོན་སངས་རྒྱས་གསུམ་པ་རབ་གསལ་གྱི་རྣམ་པར་སྤྲུལ་པ་ཐམས་