[A:507]dus sgron bskal du bshad pas bskal pa bzang po 'di la sangs rgyas stong 'byung bar gsungs pa'i 'o skol gyi ston pa shAkya seng ge'i lung rtogs kyi bstan pa yul dbus 'gyur 'chad du dar rgyas su gyur pa nas yun ring zhig nas bod du dam pa'i chos 'byung bar lha mo dri ma med pas zhus pa'i mdo las/ nga yongs su mya ngan las 'das nas lo nyis stong lnga brgya na gdong dmar can gyi yul du dam pa'i chos dar ba 'gyur ro/ /zhes sA la'i nags kyi sman ljongs ri kha ba can gyi khrod du rgyal ba'i bstan pa byung ba'ang spyir 'gro ba mi'i byung tshul lha las phul byung gi bstod 'grel du/ skya seng bu lnga dang dgra ngan dpung tshogs bcu gnyis 'thabs pa'i dus su rgyal po rU pa ti zhes pa dmag stong phrag gcig dang bcas pa bud med kyi chas su zhugs te/ ri gangs can gyi gseb tu bros pa las 'phel tshul byung zhing rgyal po bka' 'bum sogs thugs rje chen po'i chos skor rnams su spyan ras gzigs dang sgrol ma'i sprul pa spre'u dang brag srin mo 'dus pa las 'phel bar bshad pa gdong dmar sha zan gyi phrug gu shin tu gdul bar dka' bar chos la blo mi 'jug pa rnams bka' gdams glegs bam rin po cher/ bod ni rgyal po dag la tshad mar 'dzin/ /mi dbang mdzod la bod khams bde bar skyongs/ /zhes thog mar 'bangs mtha' dag rgyal po chen po zhig gi mnga' 'og tu bsdus te rim gyis sangs rgyas kyi 'phrin las 'byung bar mkhyen nas bod spyi'i rgyal po la snga ba rje gnya' khri btsan po nas rgyal rabs rim par byung la/