rten mthun 'jug zang zing bdog pa la/ /phan tshun skyes su bstar ba don ldan du/ /byed pa'i ngang tshul mthong na dam chos nor/ /gtong len 'di ko dam pa'i rnam par thar/ /sngon 'dus lo paN mkhas grub mang byon nas/ /rgyal bstan dar tshe rtsol bar ci zhig ltos/ /'chad nyan dgun gyi chu bran ltar gyur ding / /thos bsam khur gyi ljid la lhag par rangs/ /snga phyir 'gyur ba'i smin grol man ngag lung / /padma'i skud par rdo rje bzhu blugs pas/ /srog 'tsho'i rig byed dran pa'i mkhyen dpyod kyi/ /tshangs ris grub pa'i lha de gzhan min drang / /sprul zhing lta na sdug nas 'ongs min par/ /skye rgu'i srog 'tsho sman gyi bla ma dngos/ /ging chen tshangs pas bsnyems btang gang gi zhabs/ /nam mkha'i snying por nges te gtsug tu blangs/ /lha min dmod pa'i lcags tims ma skyes par/ /gzur gnas blo yi dpal be'u snying ga ru/ /ri mo rab bkra'i skal ldan nabs so skyes/ /khyod zhal bdud rtsi 'thung la lhag par rings/ /rnam gsum chos 'khor dus gcig yongs bskor bar/ /dkar phyogs lha rnams dga' mgur lta ba la/ /manda ra yi smin legs phreng mdzes dang / /khor yug dbang gzhu'i dra bas sbrel phyir brdzu/ /g.yas ru'i 'dzin mar 'khrul med lam ston shes/ /nyung zad tsam yang ma bzod lus med mdas/ /re zhig bzhed pa'i dka' thub 'jig nus pa/ /ches cher lnga bdo'i shugs de gang gis bzlog /'dam skyes 'dam gyis ma gos padma ltar/ /'khor nas 'khor ba'i rgya las yongs grol yang / /slob lam slob pa'i ched du zhi bde la/ /nges par nges 'byung tshul gyis 'drid de ci/ /nam mkha'i ska rags ma des 'ching dka' ba'i/ /grangs med 'gro 'dren thugs bskyed rdo ba'i ngos/ /bris pa'i ri mo sems can zad pa'i mtha'/ /de srid mi yal rgyal sras spyod pa'i gshis/ /myos byed ces pa shing lug zla ba gsum pa'i tshes dgu la chos sde chen po dpal ldan 'bras spungs su phebs pa'i zhar byung du gra dar rgyas chos sdings su gdan grangs yab rje gnubs chen sprul pa'i zlos gar dang gdung brgyud bgres pa chos rgyal gter bdag gling pa gnyis la dpal kye rdo rje man ngag lugs dang dze tA ri'i tshe dpag med lha dgu'i dbang gnang / tshur rig 'dzin phrin las lhun grub la gter chos ci rigs pa gsan te rim gyis dga' ldan pho brang du zhag dgu'i bar stan chags pa'i dus 'khor bdag po chen po'i dbang / sindhu ra la brten pa'i bdag med lha mo bco lnga/ bde mchog dkar bo/ tog tse ba'i bsam mi khyab gsum gyi byin rlabs/ aShta'i bzlas lung / gur sprin gseb ma'i rjes gnang / sum pa lo tsA'i blo sbyong dang tshem bu lugs kyi dmar khrid gnyis 'jam dbyangs mkhyen brtse'i zin bris steng nas nyams 'khrid snga dgongs so sor smin rgyas/ rje btsun grol mchog gi 'khrid brgya'i skor yongs rdzogs/ dam chos dgongs pa yang zab kyi chos skor phal cher/ bstan gnyis gling pa'i rta glud/ kye rdor dbang chog gi lhan thabs tshar chen gyis mdzad pa/ de'i sbyin sreg dang sAtstsha 'debs chog kun mkhyen mkhyen brtses mdzad pa/ rje nyid kyis mdzad pa'i byang gter skye bdun sgrub thabs/ sambhu Ta rgyud phyi ma dang bcas pa/ gsang ba ring bsrel/ byang chub rgyan 'bum/ las sgrib rnam sbyong / rten 'brel snying po/ 'od zer can ma/ dug sel ma/ gdugs dkar mchog grub/