phyir lung yang 'bad pas bgyis/ /glegs bam thams cad dus gcig 'bad pas bsgrubs/ /bka' 'gyur nas bstan rdzogs sangs rgyas pa'i sku/ /khri phrag brgal ba'i gser gyi bris sku dang / /sAtstsha 'bum phrag byang chen mchod rten bcu/ /de sogs rnam dkar dri med dge ba'i mthus/ /bdag dang pha ma spun zla ming sring dang / /bran g.yog las byed khal khur dud 'gror bcas/ /phan thogs yi rang dkar nag 'dres pa kun/ /sgrib byang tshogs rdzogs rnam mkhyen myur thob shog /ces pa mdzad/ de ltar sku gsung thugs rten rnams la rgyud thams cad kyi rgyal po gnyis su med pa dpal dgyes pa rdo rje man ngag lugs kyi sgrub mchod dang 'brel ba'i sgo nas rab gnas bkra shis rgya mtsho la rje rdo rje 'chang dbang phyug rab brtan gyi phyag bzhes kyis brgyan te rab tu gnas pa nyin gsum ma mnga' dbul gyi dus rgyas pa dang cho ga'i mthar lhag chad kha skong ba'i zhi ba'i sbyin sreg dang bcas rgyal kun gsang ba rab 'byams kyi 'khor lo ma lus pa rten brten pa lha'i tshogs chu dang 'o ma bzhin ro gcig tu mdzad pas phyogs kun bkra shis dang bde legs kyis khyab par gyur/ bris pas gtsos bzo bo'i tshogs yon rdzongs su gser gos dar ja ras g.yu byu ru spos shel go khrab khro zangs rta drel pho mo'i gos sna snam phrug sogs kyi rnyed pas blo'i re ba yongs su bkang ste tshim par mdzad/ zla ba de ka'i tshes nyi shu'i rgyal phur gyi 'grub sbyor nas bzung mkhan chen zha lu pa khyab bdag rin cen bsod nams mchog grub/ 'bras yul skyed tshal mkhan po byams pa ngag dbang bstan 'dzin/ rtse tshogs dum bu chos 'khor sogs phyogs nas 'dus pa dang / gnyug mar gnas pa bcas dge 'dun du ma'i tshogs la dus gsum bder gshegs rnams kyi bgrod pa gcig pa'i lam mdo rgyud man ngag kun gyi yang bcud/ 'phags yul grub dbang birWa pa chen po la rje btsun rdo rje btsun mos mngon sum du gnang ba'i lam 'bras bu dang bcas pa/ 'bras bu lam dang bcas pa/ gcig shes pas mang po grol ba/ skyon yon tan dang bar chad dngos grub tu blang ba/ ltas ngan g.yang du len pa/ ting nge 'dzin ngo shes pas bsam gtan gyi gegs sel ba/ bar chad ngo shes pas bdud kyi gegs sel ba/ sde snod gsum gyi de nyid shes pas gser 'gyur gyi rtsi lta bu/ mchog thun gyi dngos grub ma lus pa 'byung ba'i gsung ngag rin po che'i 'khrid bod yul 'dir 'jig rten gyi mig gcig pu 'brog mi lo tsA ba chen pos legs par bsgyur ba nas bzung bshad srol mi 'dra ba mang du byung ba'i gtso bo rdo rje 'chang dang zhal gnyis pa rje btsun sa skya pa yab sras la bka' babs pa tshogs bshad dang slob bshad gnyis las rjes 'brangs mkhas grub phal cher la ma grags pa rin cen sgang pa gdung brgyud sgos kyi zab chos lta bu gsang chen slob bshad kyi nyams 'khrid zab mo dbang byin rlabs rgyab brten lung dang bcas pa mtha' dag zla ba phyed bzhi lhag tsam gyi bar gnang rjes dgyes pa rdo rje'i rgya gzhung so gnyis tsam gnang ba'i dus kho bos ngor rdzong tshar lugs gsum ga'i lam 'bras thob pas rgyun gsum ga yod gshis gang 'dod kyi rjes su 'brangs chog ces bka' stsal zhing / me sprel hor zla gnyis pa'i tshes brgyad la gegs med du grub pa ni/ sbyang gzhi dkyil 'khor rnam bzhi'i zhing sa mchog tu gshin