[A:511]nang na dgra bo'i snying khrag blug pa mi rtsib kyis thur ma byas te gsol ba mngon sum du bstan nas rjes su bzung bar gsol ba btab pas/ khyod kyi mi brgyud dang chos brgyud bcas pa'i srung ma ngas bya/ khyod khams nas zla ba gcig la 'khor bar gyis zhes gsung gi gnang ba thob pas 'a zha mthu che bar grags shing mgon po 'di nyid rtsis mgon yin par sems/ khams su byon nas bla chen gyi mkhan bu tre bo mchog bla la sdom pa der bas ma'i rgyun blangs nas sna nam 'dres brda/ 'o yug /gnas po che sogs dge 'dun gyi sde btsugs pa de dag las gyes te mang du 'phel/ kun mkhyen bu'i chos 'byung du sdom pa chab gtor ma'i rgyun blangs zhes snang / de nas 'a zha lha'i blo gros kyis lha ldan gtsug lag khang la zhig gsos dang rdo kong bkra shis 'od 'bar phul/ a mes jo sras phur pa 'phel gyis rngog lo rgya gar du 'byon pa'i cha rkyen la gser srang bcu bdun phul/ gegs med par phyir byon nas lo tsA ba'i chos 'khor gyi thog ma yang 'dol chung du bskor/ dpal ayon chen pos byin gyis brlabs shing ma hA kA la dngos su bzhugs pa'i gnas dang zung 'brel du jo bo blo gros kyis gnas gzhi btab pas rtsis gnas gsal bar grags/ dpal ldan sa skya pa'i mnga' thang sgang la rgyag pa'i dus chos kyi rgyal po 'phags pa rin po che dang ti shri kun blo sogs kyi zhabs la/ nam mkha' rgyal mtshan/ nam mkha' bzang po/ shAkya seng ge can gyis gtugs par nyang gzhung mtha' dag shes su bcug