[A:558]du bzhugs ma 'dod par 'dug gral 'gor bzhugs chug zer ba de bzhin du mdzad pas dgyes pa'i rnam 'gyur bstan pa na nye skor du 'khod pa rnams byis pa dkyus ma'i ngang tshul dang mi ldan pa zhig go snyam ngo mtshar du 'dzin/ dgung lo gnyis 'gro ba'i tshe rje dbang phyug rab brtan gyis sku 'gag gsar pa bzhes nas byang gter gyi tshe dbang lcags sdong ma stsal ba'i skabs sku'i dbyibs dang na bza'i khyad par sogs thugs la nges te sku na yar phebs nas dran zhes sku 'khor ba tshor bka' stsal pa ni lo ngo gnyis kyi dus de 'dra gang zag phal par 'byung ba mi srid cing gal te dus der ngo 'phrod pa lta bu'i dbang du byas na'ang rjes su dran gsos par rang cag rnams la mi 'byung ba mngon sum du grub pas/ mngon pa kun las btus su/ dran pa gang zhe na/ 'dris pa'i dngos po la sems kyis brjed pa med pa ste rnam par mi g.yeng ba'i las can no/ /zhes sku tshe gzhan du zhi gnas sam bskyed pa'i rim pa'i ting nge 'dzin la goms pa'i nang rtags phyir shar te blo ldan zhig gis dpyad na 'di gcig pu'i rnam thar yang dpag par dka'a'o/ /sngon med pa'i rdo chung ngu dang 'jim pa spyin po mang po khu lung gi gzhis ka'i ltag nas rnyed pa dang / zan sogs la gtsug lag khang dang dge 'dun gyi sde'i dbyibs/ dkon cog gi sku gsung thugs rten gyi rnam pa bsgrigs par ting dang kong bu sogs bzos nas mchod pa 'bul ba/ dung dkar bus te dge 'dun tshogs pa/ chos 'chad nyan gyi tshul dang / de bzhin du rang nyid kyi bla ma dang