[A:560]cad mkhyen pa bu ston rin po che'i gdan sa zha lu ri phug chos kyi pho brang du rigs brgya'i bdag po dbang phyug rab brtan bzhugs pa'i spyan sngar phebs gtsug phud bzhes shing mtshan mgon po bsod nams mchog ldan bstan pa'i rgyal mtshan dpal bzang por gsol/ rkyen sel rjes gnang ci rigs gsan nas gzhis su thegs/ thun mong zhes pa lcags khyi'i lo dgung lo brgyad kyi thog slar zha lu ri phug tu phebs pa'i nub snga ma rje bla ma'i 'od gsal du rtsis kyi mgon po chos skyong yid bzhin nor bu'i mngag gzhug dam tshig srog gi bdag po zab ber dkar po'i gos dang khrab gsol zhing seng ge dkar por zhon pa lag na rgya spos khres kyi chun po dar skud kyis bcings pa spar ba'i tha snyad med par dri zhim pa phun sum tshogs pas khyab pa zhig khyer nas nam mkhar yud yud 'gro ba byung ba sang nyin bka' las mdang de bzhin byung ba khyed 'byon pa'i ltas su 'dug cing tshul khrims rnam par dag pa yong ba'i brdar go gsung / rje nyid kyi drung du tshigs snga ma dge tshul gyi dngos por bsgrubs/ mi ring bar rje rdo rje 'chang la stod la chibs kha bsgyur ba'i zham 'bring mdzad nas gdan sa chen po dpal ldan sa skyar phebs 'jam dbyangs gzi 'od 'bar ba dang chos skyong mngon sum du bzhugs pa'i sgo rum mgon khang sogs la gnas gzigs rgyas par mdzad/ phyir lam lha rtse dang 'dar phyogs su thegs skabs/ sku na gzhon pa la des shing mdzangs pa rnam dpyod kyi mthu phul du phyin pa la phyogs de'i skye bo rnams ngo mtshar zhing yi rang bar gyur/