[A:༢༧]མཛད། སྔར་སློབ་དཔོན་པར་ཕྱག་མི་འཚལ་བའི་བརྒྱ་འོག་གི་དྲུང་འཁོར་རྣམས་ཀྱིས་ཀྱང་གུས་པའི་སོར་བཅུ་སྙིང་ཁར་སྦྱར་བ་སོགས་མཆོད་ཡོན་ཐམས་ཅད་ཐུགས་ཡིད་གཅིག་འདྲེས་ཀྱི་དགའ་སྟོན་ཕུན་སུམ་ཚོགས་པ་མཛད་དོ། །མཁས་གྲུབ་ཡོངས་འཛིན་ཚངས་པའི་རལ་ཀླུང་ནས། །མཁྱེན་བརྩོན་སྐལ་ལྡན་ཤིང་རྟས་ཉེར་དྲངས་པ། །དབང་ལུང་རིག་གཏད་རྗེས་གནང་གངྒཱའི་རྒྱུན། །འཐུང་ནུས་ཛཧྣུ་དེ་གཞན་ན་སུ། །ཁྱད་པར་དཀྱིལ་འཁོར་བྱེ་བ་སྤྲོ་བསྡུའི་མགོན། །རིན་ཆེན་ཆོས་ཀྱི་འབྱུང་གནས་རྒྱ་མཚོའི་རླབས། །ལེགས་བཤད་ཡོལ་མེད་ཕྱག་མཚན་ཡོངས་གཏད་པ། །བུ་སྟོན་བསྟན་པའི་བདག་པོར་མངའ་གསོལ་བཞིན། །ཕྱི་ནང་གསང་བའི་བྲག་རི་མཐོར་བརྩེགས་རྫོང༌། །རྒྱུད་གསུམ་དྲེགས་པ་གསལ་སྟོང་ཟུང་འཇུག་ཏུ། །ངོ་སྤྲོད་མཁའ་འགྲོའི་ཁ་རླངས་སྙན་བརྒྱུད་ཀུན། །ཕ་རྒོད་གནས་གསར་ཆོས་རྗེའི་དྲིན་ལས་རྙེད། །ཡིད་འཕྲོག་ལྟ་ན་སྡུག་པའི་སྐྱེད་ཚལ་དུ། །ཟླ་མེད་བླ་མ་མཆོག་དང་མི་འབྲལ་བར། །ཞལ་འཆེས་ཉི་མའི་གཉེན་དང་ཀུན་དགའ་བོའི། །རྗེས་འགྲོའི་རྣམ་ཐར་འདི་ཀོ་གཅིག་ཏུ་མཚར། །མ་རུངས་རྒྱ་འདྲེར་རྫུ་བའི་སྙིང་དྲོན་ཁྲག །མིའུ་ཐུང་སྲིན་པོའི་ཞལ་སྒོར་ཧུབ་ཀྱིས་དྲངས། །གང་སྣང་བླ་མའི་ངོ་བོར་རྟག་འཆར་བ། །རབ་འབྱམས་དག་པའི་ཞིང་གི་བཀོད་པར་འགྲན། །སུམ་རྩེན་ས་ལ་འཕོས་འདྲ་ཉང་སྟོང་ཡུལ། །རིན་ཅེན་ལྡིང་ཁང་ཕུབ་པའི་གཞལ་མེད་ཆེར། །ཁྱབ་བདག་རྣམ་པར་སྣང་མཛད་འཚམས་སྤྲིན་མདོག །གསར་བའི་བླ་གོས་འཆང་ལ་གཅིག་ཏུ་བྲེལ། །མི་རིང་བར་རི་ཕུག་ཏུ་རྗེ་རྡོ་རྗེ་འཆང་གི་ཞབས་དྲུང་དུ་བྱོན་རིན་པོ་ཆེ་གསེར་གྱི་