[A:388]ltar byung ba bzhin du phul/ rgyab skyor lung la jo lcags ma gtso bor gyur pa'i lam 'bras glegs bam kha skong dang bcas pa/ rje btsun gong ma rnams kyi yi ge mang po'i lung / bla ma lnga bcu pa'i 'grel pa dngos grub sgo 'byed sogs tshar chen yab sras kyis mdzad pa'i yi ge mang po/ /gong gi khrid yig rnams yongs su rdzogs pa'i lung / bskyed rdzogs kyi rnam bshad tshar chen gyis mdzad pa/ gsung gi bkra shis tshar chen chos kyi rgyal pos mdzad pa sogs mdor na mkhan chen de nyid kyis nged rang la gsung ngag slob bshad kyi chos skor gnang ba rnams gcig kyang ma lus par phul zhing / lnga pa chen pos mkhan chen de nyid la gnang ba'i phyag dpe rnams nged rang la bsngags brjod bcas bka' drin bskyangs byung ba'ang chos bdag por sbrod pa'i tshul gyis sa skya pa'i bstan pa spyi dang / bye brag zab mo slob bshad pa'i bstan pa gong sa lnga pa chen po'i bslab ston ltar slob bshad kyi bstan pa gsal bar mdzad dgos pa'i snyan 'bul bcas phyag dpe rnams kyang zhabs drung dbon rin po cher phul lo/ /bdag med mkha' 'gro'i zhal drod dza hu'i rgyun/ /rnal 'byor dbang phyug thugs kyi rgya mtshor 'khyil/ /de las rjes 'brang chu klung bye ba brgyas/ /'phags bod 'dzin ma'i khyon kun dog por byas/ /'jigs bral stogs bcu'i bdag nyid bi rU'i zhabs/ /byang phyogs kha ba ri pa'i dpung gnyen du/ /legs byon sa skya'i 'jam mgon rjes 'brang gis/ /tshul 'di nyi zla lta bur gsal bar mdzad/ /thun mong gtam gyi ba tshwa'i rdzing bu'i khrod/ /tshogs bshad 'dam skyes gzhon nu ches mang yang / /gsang chen slob bshad u dumWara'i bcud/ /blo gsal rgya mtsho rjes 'brang bcas las su/ /khyab bdag sku bzhi'i bdag nyid